वीरगंज। | गत सोमबार बेलुकादेखि सक्रिय भएको मनसुनी झरी शनिबारदेखि क्रमिक रुपमा सुधार आउने प्रक्षेपण गरिएको छ। भारतको मध्य प्रदेशको पूर्वी भूभागमा न्यून चापीय क्षेत्रको विकास हुँदा देशैभर मनसुन मौसम सक्रिय भएको हो। न्यूनचापीय क्षेत्रको प्रभावले उपत्यकासहित पूर्वी र मध्य नेपालका अधिकांश क्षेत्रमा भारी वर्षा हुने अनुमान गरिएको छ।

‘अहिले सुदुरपश्चिम र कर्णाली प्रदेशमा मनसुन सुधार छ। शुक्रबार उपत्यकासहित प्रदेश एक, प्रदेश दुई, बागमती र गण्डकीमा मनसुन सक्रिय छ। ती क्षेत्रमा भारी वर्षाको सम्भावना पनि छ,’ मौसमविद बरुण पौडेलले भने, ‘शनिवारदेखि मौसममा सुधार हुने देखिन्छ। पश्चिमबाट मौसमा सुधार हुँदै आएकाले मनसुन सकिने वा नसकिने एक÷दुई दिनमा अनुमान गर्न सकिएला ।’

अहिलेसम्म पूर्वी वायू सक्रिय भएकाले मनसुन सकिने वा नसकिने अनुमान गर्न नसकिने पौडेलले बताए।  शुक्रबार दिउँसो र राति देशैभर बदली भई हल्कादेखि मध्यम वर्षाको सम्भावना रहेको जल तथा मौसम विज्ञान विभाग पूर्वानुमान महाशाखाले जनाएको छ । तर, प्रदेश एक, प्रदेश दुई, बागमती र गण्डकी प्रदेशका एक÷दुई स्थानमा भारी वर्षा हुने आँकलन गरिएको छ ।