सप्तरी । कोरोना भाइरस संक्रमणबाट सप्तरीका प्रमुख जिल्ला अधिकारी (सिडिओ) का भान्सेको मृत्यु भएको छ ।

जिल्ला प्रशासन कार्यालय सप्तरी राजविराजमा कार्यरत ५५ वर्षीय कार्यालय सहयोगी पुरुषको कोरोना संक्रमणले बिहीबार बिहान ५ बजेतिर मृत्यु भएको हो ।

गत ३१ भदौमा कोरोना पोजेटिभ देखिएपछि उनी होम आइसोलेसनमा बसेका थिए । शुरुमा ज्वरो देखिए पनि पछिल्लो चार दिनयता उनको स्वास्थ्य अवस्था सामान्य रहेको जिल्ला प्रशासन कार्यालयका प्रशासकीय अधिकृत आनन्द ठाकुरले जानकारी दिएका छन् ।

स्वास्थ्य अवस्था सामान्य रहेको अवस्थामा उनको मृत्यु भएको ठाकुरले बताएका छन् । मृत्यु भएका पुरुष प्रमुख जिल्ला अधिकारीको निवासमा खाना बनाउने गर्थे । उनी लामो समयदेखि प्रजिअ निवासमै खाना पकाउने काम गर्दै आएका थिए । योसँगै सप्तरीमा कोरोनाबाट ज्यान गुमाउनेको संख्या १२ पुगेको छ ।