विरगंंज । जिल्ला प्रहरी कार्यालय बाराले १२ लाख १६ हजार नेपाली नक्कली नोटसहित दुई जनालाई पक्राउ गरेको छ ।बारा प्रहरीले नक्कली नोटसहित बाराको बारागढी गाउँपालिका वडा नम्बर ५ सिघासनीका २३ वर्षीय बलिराम चौधरी भारत विहार मोत्तिहारी जिल्ला झरौखरका २७ वर्षीय सन्दीप कुमारलाई पक्राउ गरेको हो । प्रहरीले उनिहरुबाट बा. ६४ प ९७०६ नम्बरको मोटर साइकलसमेत जफत गरेको जनाएको छ ।

सिम्रौनगढ नगरपालिका वडा नम्बर ९ बसवरिया नहरस्थित चोरीका मोबाइलहरू खरीद बिक्री भएको भन्ने सूचनाको आधारमा जिल्ला प्रहरी कार्यालयबाट गएको टोलिले दुबै जनालाई रोकि चेकजाँच गर्दा सन्दीपले बोकेको झोलाभित्र रातो प्लाष्टिकमा लुकाई छिपाई राखेको अवस्थामा नेपाली १ हजार दरको नक्कली नोट थान १ हजार २ सय १६ थान बरामद गरेको थियो ।

प्रारम्भिक अनुसन्धानको क्रममा पक्राउ परेका दुवै जनालाइ एक अज्ञात व्यक्तिले ३० वटा चोरीको मोबाइल खरिद गरी उक्त रकम दिएको भन्ने कुरा खुल्न आएको बाराका प्रहरी प्रबक्ता गौतम मिश्रले जानकारी दिए ।

मोबाइल खरिद गरेर नक्कली नोट दिने व्यक्ति भने फरार भएका छन् । नक्कली नोटसहित पक्राउ परेका दुबै जनालाई नोट सहित प्रहरी हिरासतमा राखिएको र नोट दिने व्यक्तिको खोजी कार्या भइरहेको मिश्रले बताए ।