विरगंज । भारतबाट ल्याउँदै गरेको प्याज र युरिया मल बारा प्रहरीले नियन्त्रणमा लिएको छ। सिमा नाका सिल भएको बेला भन्सार छली गरेर नेपालतर्फ भित्र्याइएको करिब १० लाख रुपैयाँ बराबरको अवैध सामग्री जिल्ला प्रहरी कार्यालय बाराले नियन्त्रणमा लिई भन्सारमा बुझाएको हो।
प्रहरीले बारा जिल्लाको विभिन्न स्थानबाट १० लाख मूल्य बराबरको प्याज, युरिया मललगायतका सामाग्री बरामद गरेको हो।
जिल्ला प्रहरी कार्यालय बाराबाट खटिएको गस्ति टोलिले असोज ३ गते दिउँसो १ बजे आदर्शकोतवाल गाउँपालिका वडा नम्बर ६ पटेर्वा टोलस्थित सडक खण्डमा भारतबाट भन्सार छलि चोरी पैठारी गरी नेपाल भित्र्याइएको भारतीय नम्बर पलेट विआर०५जीवि २२०६ नम्बरको ट्रयाक्टर नियन्त्रणमा लिएको बारा प्रहरी प्रवक्ता डिएसपी गौतम मिश्राले जनाकारी दिए।
सिमा सिल भएका बेला चोरबाटो भएर सामान भित्रिदै गरेको सुचनाका आधारमा पुगेको प्रहरीले सामान नियन्त्रणमा लिएको हो।
बरामद गरिएको ट्रयाक्टर आठ लाख रुपैयाँ बराबरको रहेको प्रहरीले जनाएको छ। बरामद गरेको १६ हजार ८ सय बराबरको २१ बोरा युरिया मल, ८२ हजार २ सय ५० रुपैयाँ बराबरको ६ बोरामा रहेको २ सय ४५ केजी प्याज, ९९ हजार ५० रुपैया बराबरको प्याज लोड गर्न प्रयोग गरिएको २ वटा मोटरसाइकल नियन्त्रणमा लिएको छ।
बरामद सामाग्री भन्सार ऐन अनुसार आवश्यक कारवाहीको लागि भन्सार कार्यालय वीरगन्जमा बुझाइएको प्रहरीले जनाएको छ।
