वीरगंज। प्रदेश २ को अधिकांश जिल्लामा कोरोना संक्रमण फैलिन नदिनका लागि गरिएको निषेधाज्ञा खुकुलो बनाइएसँगै संक्रमित पनि थपिएका छन् । बितेको २४ घण्टामा प्रदेश २ मा २ सय ५१ जना कोरोना संक्रमित थपिएका छन् । यससँगै प्रदेश २ मा कोरोना संक्रमितको संख्या १२ हजार २ सय १४  पुगेको छ।  

प्रादेशिक जनस्वास्थ्य प्रयोगशाला जनकपुर, नारायणी उपक्षेत्रीय अस्पताल वीरगंज र गजेन्द्र नारायण सिंह सगरमाथा अस्पताल राजविराजमा गरिएको परीक्षणमा २५१ जनाको रिपोर्ट पोजेटिभ आएको स्वास्थ्य निर्देशनालय प्रदेश २ का वरिष्ठ जनस्वास्थ्य प्रशासक विजय कुमार झाले जानकारी दिए ।

सिरहामा सबैभन्दा बढी कोरोना संक्रमण पुष्टि भएको छ । सिरहामा १ सय ४८ कैदी सहित १ सय ७० जनामा कोरोना संक्रमण पुष्टि भएको जनाइएको छ ।त्यस्तै सप्तरीमा ४३, रौतहटमा २३, महोत्तरीमा ७, बारामा ४ र धनुषामा ४ जनामा कोरोना संक्रमण पुष्टि भएको स्वास्थ्य निर्देशनालय प्रदेश नम्बर २ ले जनाएको छ ।

त्यसैगरी मंगलबार यस प्रदेशमा १ सय ८१ जना कोरोनामुक्त समेत भएका छन् । ६ महिला र १ सय ७५ पुरुष निको भएसँगै अहिले कोरोना मुक्त हुनेको संख्या ६ हजार ५ सय ८३ पुगेको छ । पर्सामा १ सय ६९ जना,  बारामा ८ र धनुषामा ४ जना कोरोना मुक्त भएको जनाइएको छ ।

पछिल्लो २४ घण्टामा १ जना कोरोना संक्रमितको मृत्यु समेत भएको छ । बारा जिल्लाको डुमरवाना नगरपालिका वडा नम्रब १४ बस्ने ५५ वर्षीय महिलाको मृत्यु भएको जनाइएको छ । यस प्रदेशमा कोरोनाबाट मृत्यु हुनेको संख्या १ सय १२ जना पुगेको छ । मृत्यु हुनेमा ९३ पुरुष र १९ महिला रहेका छ ।