वीरगंज संजालवीरगंज। प्रदेश २ को सरकारमा रहेका समाजवादी पार्टी र राष्ट्रिय जनता पार्टी नेपालबीच एकीकरण भएको औपचारिक जानकारी प्रदेशसभा सचिवालयलाई गराइएको छ ।
प्रदेश २ का प्रदेशसभा सभामुख सरोज यादवलाई प्रदेश २ का सत्तारुढ दुई दलबीच एकीकरण भएको औपचारिक जानकारी दिइएको हो ।
योसँगै प्रदेश २ प्रदेशसभामा अब साविकका दुवै सत्तारुढ दलको संसदीय दल एकीकरण हुने प्रकृया शुरु भएको छ । दुवै दलको संसदीय दललाई एकीकृत गरी जनता समाजवादी पार्टी नेपालको ससदीय दल गठन हुनेछ ।
यो सँगै प्रदेश २ मा अब मुख्यमन्त्री को बन्ला भन्ने चर्चा पनि शुरु भएको छ ।प्रदेश २ मा हाल समाजवादी पार्टी र राजपा नेपालको अलग अलग संसदीय दल छन् ।
दुवै दल एक भएपछि संसदीय दलमा जसपा नेपाल अस्तित्वमा आउने छ । जसपा नेपालका संसदीय दलका नेता हुने व्यक्ति नै अब प्रदेश २ को मुख्यमन्त्री हुनेछ । त्यसैले संसदीय दलको नेता बन्नका लागि नेताहरुको दौडधुप शुरु भएको छ ।
प्रदेशसभाका सभामुख सरोज यादवले जसपा नेपालले दल एकीकरण भएको जानकारी पत्र पठाएको र त्यो प्राप्त भएको जानकारी दिए । प्रदेशसभा सञ्चालन हुने बित्तिकै एकीकरणको प्रकृया शुरु गर्ने उनले बताए ।
जनकपुरमा हाल निषेधाज्ञा जारी छ । त्यो हट्ने बित्तिकै बैठक बसेर दुवै पार्टीको संसदीय दलको एकीकरण प्रकृया शुरु हुने उनले बताए ।
मुख्यमन्त्री लालबाबु राउतले पनि प्रदेशसभाको बैठक बोलाएर एकीकरण प्रकृया टुङ्गो लगाउन भनेको सभामुख यादवले बताए । षेधज्ञाको अवधि भदौ १४ सम्म जारी रहेछ । आइतबार सकिन लागेको निषेधाज्ञा पुन थपेर १४ गतेसम्म कायम गरिएको हो ।
निषेधाज्ञा रहेसम्म प्रदेशसभाको बैठक बस्ने छैन । संसदीय दल एकीकरण नभएसम्म त्यहाँको सरकारमा पनि हेरफेर हुने छैन । मुख्यमन्त्री, मन्त्रीहरुले सकभर यो सरकारलाई नै निरन्तरता दिन चाहेका छन् । उनीहरुले आआफ्नो तर्फबाट केन्द्रमा त्यसकै लागि पहल पनि गरिरहेका छन् ।
प्रदेश २ सरकारको अवधि लगभग दुई वर्षमात्र बाँकी छ । यसैलाई निरन्तरता दिनका लागि मुख्यमन्त्री राउतले केन्द्रमा लबिङ गरेका छन् । उनी काठमाडौंमा भएको बेला जसपाका शीर्ष नेताहरुलाई भेटेर वर्तमान सरकारलाई नै निरन्तरता दिन आग्रह गरेको स्रोतले जनाएको छ ।
त्यसका लागि आफूलाई नै सर्वसम्मत रुपमा संसदीय दलको नेता बनाउन उनले नेताहरुलाई आग्रह गरेका छन् ।अहिले तत्कालीन राजपा नेपालका तर्फबाट लालबाबुर राउत संसदीय दलका नेता छन् भने राजपा नेपालका तर्फबाट जितेन्द्र सोनल संसदीय दलका नेता हुन् ।
मुख्यमन्त्री राउतले वर्तमान सरकारलाई नै निरन्तरता दिन आग्रह गरिरहेको बेला जसपा नेपालका प्रदेश सांसदहरुले सरकार परिवर्तनका लागि आग्रह गरेका थिए । जसपा नेपालका १५ जना प्रदेश सांसदले शीर्ष नेताहरुलाई भेटेर मुख्यमन्त्री राउत नेतृत्वको सरकार असफल भइसकेको र यसलाई परिवर्तन गरि अर्को सरकार बनाउन आग्रह गरेका थिए ।
वर्तमान सरकारका अधिकांश मन्त्रीहरु भ्रष्टाचारमा लिप्त भएको, जनतासँग गरेको प्रतिवद्धताअनुसार काम नगरेको कारण प्रदेश मन्त्रिपरिषद् पुरै परिवर्तन गरि नयाँ बनाउन उनीहरुले आग्रह गरेका थिए ।
प्रदेश २ संसदीय दलमा एकीकरण भएपछि नयाँ संसदीय दलका नेता चयन हुनेछ । बहुमत प्राप्त दलको संसदीय दलका नेताले नै सरकारको नेतृत्व गर्ने प्रावधान रहे अनुसार संसदीय दलको नेता बन्नका लागि दौडधुप बाक्लिएको जसपा नेपालका नेताहरु बताउँछन् ।
संसदीय दलका आकांक्षी हालका मुख्यमन्त्री राउतसहित जितेन्द्र सोनल, मनिष सुमन, योगेन्द्र राय यादव, विजय यादवलगायतका छन् । उनीहरुले आआफ्नो तर्फबाट लबिङ गरिरहेका छन् ।
अहिलेको सरकारमा सबभन्दा बढी आलोचना मुख्यमन्त्री राउत र अर्थ मन्त्री विजय यादवको भएको छ । दुईजनाको अन्तरद्वन्द्वका कारण प्रदेश २ का सरकार कमजोर भएको आरोप नेताहरुको छ ।
यसअघि पनि मुख्यमन्त्री पदका लागि यी दुईजनाबीच प्रतिस्पर्धा भएको थियो । प्रतिस्पर्धामा लालबाबु राउतले जितेपछि विजय यादवले त्यसलाई प्रतिष्ठाको विषय बनाएर सरकारमा मुख्यमन्त्रीलाई असहयोग गरिरहेका छन् । र, त्यो असहयोगका कारण पुरै सरकार कमजोर भएको त्यहाँका नेताहरु बताउँछन् ।ratopati
