वीरगंज |विश्व कोरोना महामारीको चपेटामा छ । सबैतिर यसकै सन्त्रास छ । अहिले अन्य कामभन्दा पनि कोरोनाबाट कसरी बच्ने भन्ने बारेमा सावधानी अपनाइरहेका छन् ।

जति मानवीय क्रियाशीलता त्यति भीडभाड, जति भीडभाड त्यति नै संक्रमण, त्यसैले धेरै मुलुकहरूले लकडाउन र निषेधाज्ञा लगाएका छन् । यहीबीचमा नेपालमा भने महिला हिंसा पनि बढेको पाइएको छ ।

प्रहरीको तथ्याङ्कलाई हेर्ने हो भने लकडाउनको समयमा नेपालमा बलात्कारको ग्राफ बढ्दो छ । बलात्कार मात्र नभएर महिला हिंसाका घटना पनि बढेको पाइएको छ । केही घटना यस्ता छन् ।

घटना–१

पर्साको बहुदरमाई नगरपालिकामा लकडाउनकै अवधि साउनमा एकजना युवा बलात्कार गरेको आरोपमा पक्राउ परे । २५ वर्षीय ती युवाले १६ वर्षीया किशोरीलाई बलात्कार गरेको आरोप लगाइएको थियो ।

घरमा कोही नभएको मौका छोपी छोरीलाई बलात्कार गरेको पीडित परिवारको आरोप छ । घटनाबारे जानकारी पाए लगत्तै प्रहरीले पीडकलाई पक्राउ ग¥यो । अहिले जजक मुद्दामा कारबाही अगाडि बढाइएको पर्सा प्रहरीको भनाइ छ ।

घटना–२

जेठ १६ मा सुनसरीको धरानमा ३८ वर्षीय बाबुद्वारा आफ्नै छोरी बलात्कृत भइन्  । बाबुले आफ्नै १४ वर्षीया छोरीलाई सुतिरहेको ठाउँमा ललाइफकाई बलात्कार गरेको प्रहरी अनुसन्धानबाट खुल्यो । लकडाउनको अवधिमा मानसिक विचलनका कारण ती पुरुषले छोरीलाई बलात्कार गरेको प्रहरीको बयानले देखायो ।

पर्सा र सुनसरीमा भएका यी दुई घटना त केही उदाहरणमात्रै हुन् । प्रहरी प्रधान कार्यालयको तथ्यांकअनुसार देशभरिमा पाँच महिनामै साढे १४ सयभन्दा बढी महिला हिंसाका घटना र २१ सयभन्दा बढी बलात्कारका घटना भएका छन् ।

यी घटना कोरोना भाइरस (कोभिड १९) ले मुलुक चपेटामा परिरहेका बेला भएका गम्भीर प्रकृतिका अपराध हुन् । लकडाउनमा परिवारसँगै भएका बेला होस् वा अन्य अवस्थामा आपराधिक मनोवृत्ति भएका व्यक्तिले अपराध गरेको देखिन्छ । सुरक्षाकर्मी परिचालनको संख्या बढे पनि यस्ता प्रकृतिका अपराध नियन्त्रणमा भने खासै सुधार देखिँदैन ।

लकडाउनमा घरेलु हिंसा धेरै

प्रहरी प्रधान कार्यालयका अनुसार लकडाउनको अवधि (चैत ११ देखि साउनसम्म) मा ६ सय ३२ वटा जबरजस्ती करणीका घटना भएका छन् । यो पाँच महिनाको अवधिमा सबैभन्दा घरेलु हिंसाका र त्यसपछि बढी आत्महत्याका घटना भएको प्रहरी तथ्यांक छ । प्रहरी मुख्यालयका अनुसार यो अवधिमा सबैभन्दा बढी घरेलु हिंसा १ हजार ४ सय ६३ र आत्महत्याका ११ सय ९० घटना भएको प्रहरी तथ्यांक छ । 

प्रदेशहरूको तुलनामा सबैभन्दा बढी प्रदेश–१ मा जबरजस्ती करणीका घटना भएका छन् । प्रहरी तथ्यांक अनुसार प्रदेश–१ मा १ सय ५० र सबै भन्दा कम कर्णाली प्रदेशमा ३७ वटा जबरजस्ती करणीका घटना भएका छन् । यसैगरी घरेलु हिंसातर्फ सबैभन्दा बढी प्रदेश–२ मा ४ सय ३१ र सबैभन्दा कम प्रदेश–१ मा ४५ वटा घटना भएका छन् । 

महिला हिंसाको तेस्रो नम्बरमा बलात्कारका घटना धेरै भएको तथ्यांक छ । यो संख्या सामान्य अवस्थाको भन्दा धेरै हो । प्रहरी प्रधान कार्यालयको गत आर्थिक वर्षको तथ्यांक हेर्ने हो भने एक वर्षमा २१ सय ४४ वटा जबरजस्ती करणीका घटना भएका छन् ।

दैनिक १४ बलात्कार र ९ महिला हिंसाका घटना

लकडानको पाँचौ महिनासम्म देशभरिमा साढे १४ सयभन्दा बढी महिला हिंसाका घटना भएका छन् । जुन बलात्कार तथा अन्य घटनाबाहेकका हुन् । प्रहरी तथ्यांकलाई हेर्ने हो भने यो अवधिमा दैनिक ९ वटा महिला हिंसाका घटना भएका छन् । यसैगरी यही पाँच महिनामा २ हजार १ सय ४४ वटा बलात्कारका घटना भएका छन् । अर्थात् यसलाई दैनिकरूपमा हेर्ने हो भने १४ वटा बलात्कारका घटना भएको प्रहरी तथ्यांकले देखाउँछ ।

नेपाल प्रहरीका अनुसार तनावका कारण महिला हिंसाका घटनामा वृद्धि भएको छ । घरमा बस्दाबस्दै धेरै तनावबढेपछि महिला हिंसाका घटनामा वृद्धि भएको प्रहरी प्रवक्ता कुबेर कडायतले जानकारी दिए । उनका अनुसार खास गरी गरिबीसँग जोडिएको आर्थिक अभाव, बेरोजगारीले हुने मानसिक तनाव जस्ता कुराले अपराध जन्मिएको देखिन्छ । यसले समाज अझै चेतनशील नभएको पुष्टि समेत गरेको उनको तर्क छ ।यो समाचार फरक धार अन्लाईन को लागि अली असगरले लेख्नु भएको छ।