बीरगन्ज। नेपालमा कोरोना संक्रमितको संख्या २९ हजार नाघेको छ। गत २४ घण्टामा ७ सय ७ जना थपिएसँगै कोरोना संक्रमितको संख्या २९ हजार ६ सय ४५ पुगेको स्वास्थ्य तथा जनसंख्या मन्त्रालयले जनाएको छ।

५२ जिल्लाका १ सय ९२ महिला र ५ सय १५ महिला गरी ७ सय ७ जनामा कोरोना भेटिएको मन्त्रालयका प्रवक्ता डा जागेश्वर गौतमले बताए। यसअघि बुधबार ३९ जिल्लामा मात्र कोरोना संक्रमित भेटिएका थिए।

प्रदेश १ को ६ जिल्लामा ३७ जना संक्रमित भेटिएका छन्। उदयपुरमा ४, झापामा १, तेह्रथुममा ९, धनकुटामा १, मोरङमा ९ र सुनसरीमा १३ जना संक्रमित भेटिएका छन्।

प्रदेश २ को ८ जिल्लामा २ सय ४८ संक्रमित भेटिएको मन्त्रालयले जनाएको छ। धनुषामा ३१, पर्सामा ५५, बारामा ८, महोत्तरीमा १५, रौतहटमा ६, सप्तरीमा १९, सर्लाहीमा ९३ र सिरहामा २१ जना संक्रमित भेटिएका छन्।

बागमती प्रदेशमा कोरोना संक्रमित पुष्टि हुनेको संख्या २ सय ३६ पुगेको छ। गत २४ घण्टामा ११ जिल्लाका गरी २ सय ३६ जनामा कोरोना भेटिएको हो। काठमाडौंमा मात्र १ सय ७४ जना संक्रमित भेटिएका छन्। काभ्रे र चितवनमा १/१, दोलखा र धादिङमा २/२, नुवाकोटमा ३, भक्तपुरमा ८, मकवानपुरमा २५, ललितपुरमा १८, सिन्धुपाल्चोक र सिन्धुलीमा १/१ जना संक्रमित भेटिएको मन्त्रालयले जनाएको छ।

यस्तै गण्डकी प्रदेशको ६ जिल्लाका ३४ जनामा कोरोना पुष्टि भएको छ। कास्कीका १९, गोरखाका १, तनहुँका २, नवलपरासी पूर्वका ३, बागलुङका ८ र स्याङजाका १ जनामा कोरोना पुष्टि भएको हो।

गत २४ घण्टामा प्रदेश ५ मा आठ जिल्लाका ७५ जनामा कोरोना पाएको छ। कपिलवस्तुमा ३०, गुल्मीमा ३, दाङमा ४, प्युठानमा १, बर्दियामा २, बाँकेमा १६, रुपन्देहीमा १८ र रोल्पामा १ जनामा कोरोना भेटिएको मन्त्रालयले जनाएको छ।

कर्णाली प्रदेशको ६ जिल्लामा पनि कोरोना संक्रमित फेला परेका छन्। गत २४ घण्टामा मात्र कर्णाली प्रदेशमा २४ जना संक्रमित फेला परेको प्रवक्ता गौतमले जानकारी दिए। उनका अनुसार कालिकोट, रुकुम पश्चिम, सल्यान, सुर्खेत र जाजरकोटमा १/१, दैलेखमा १९ जना संक्रमित भेटिएका छन्।

यस्तै, सुदूरपश्चिमको सात जिल्लामा ५३ जनामा कोरोना पुष्टि भएको छ। अछाममा ३१, कैलाली, दार्चुला, बझाङ र बैतडीमा १/१, डडेल्धुरामा २ र डोटीमा १६ जनामा कोरोना पुष्टि भएको हो।

कोरोनाको आशंकामा गत २४ घण्टामा ११ हजार ६ सय २७ जनाको पिसिआर परीक्षण भएको छ। यो सँगै नेपालमा पिसिआर परीक्षण हुनेको संख्या ५ लाख ६६ हजार १५ जना पुगेको छ।

कुल संक्रमितमध्ये हाल ११ हजार ५ सय ५५ सक्रिय संक्रमित छन्। क्वारेन्टाइनमा रहने व्यक्तिको संख्या ११ हजार ७ सय ६८ पुगेको मन्त्रालयले जनाएको छ।