वीरगंज | कोरोना त्रासले यति सताएको छ कि कोरोनाको आशंकामात्र हुनेबित्तिकै अस्पतालका स्वास्थ्यकर्मी त्रस्त हुन्छन्, उपचार गर्ने मान्दैनन्, भर्ना नै लिइँदैन । कोरोनाको रिपोर्ट पोजेटिभ नआउँदासम्म आइसोलेसनले लिन मान्दैन । अब, बिरामी हुनै नपाइने भयो ।
सोमबार राति स्वासप्रश्वासमा समस्या भएर हेटौंडा अस्पताल पुगेकी हेटौंडा–५ की ३० वर्षीया महिलाले अस्पतालको आँगन टेक्न पाइनन् ।

किनकि, उनलाई एम्बुलेन्सबाट नै नओराली अस्पतालले रिफर गरिएको कागज थमाएर भरतपुर पठाइदियो ।उनका पतिलाई केही दिनअघि कोरोना पुष्टि भएको थियो । उनको भने रिपोर्ट आइसकेको थिएन । कोरोना संक्रमित परिवारका सदस्य भएको जानकारी पाएपछि अस्पतालले उनलाई बाहिरबाटै रिफर गरेको हो ।

ती बिरामी महिलाका पतिलाई कोरोना संक्रमण भएको भन्ने थाहा पाएको अस्पतालले पनि ती महिलालाई भर्ना गरेर राख्न मानेन ।हेटौंडा अस्पतालले रिफर गरेपछि राति नै चितवन मेडिकल कलेज पुर्‍याइएकोमा उनलाई त्यहाँ केहीबेर अक्सिजन दिएर रगत जाँच गरियो ।

अस्पतालबाट फर्काइएकी महिला घरमै बस्न बाध्य छिन् ।घटनाका साक्षी हेटौंडा–५ अध्यक्ष राजेश बानियाँले अब बिरामीले उपचार नै नपाएर मृत्यु हुनुपर्ने अबस्था आएको बताउनुभयो । सरकारी अस्पतालमै बिरामीमाथि कोरोनाको आशंकामा विभेद गरिने निन्दनीय भएको उहाँको भनाइ छ ।

‘प्रदेशको राजधानीमा रहेको अस्पतालमा आबश्यक स्वास्थ्य उपकरण तयारी नगरिनु र कोरोनाको आशंकाकै भरमा बिरामी रिफर गरिनु निकै दुःखद् कुरा हो । यसबारे सम्बन्धित निकायले बेलैमा ध्यान देओस्,’ बानियाँले भन्नुभयो । कोरोना परीक्षणका लागि ३ दिनअघि स्वाब दिइएको भए पनि ती महिलाको रिपोर्ट आएको छैन ।

‘रिपोर्ट नआउँदै बिरामीलाई आइसोलेसनमा लैजान मान्दैनन् । अस्पताल लैजाँदा भर्ना लिँदैनन् । बिरामीलाई भने गाह्रो भइसकेको छ,’ बानियाँले भन्नुभयो । हेटौंडा–५ मा हालसम्म २२ जनामा कोरोना संक्रमण पुष्टि भइसकेको छ । त्यसमध्ये अधिकांश बिरामी होम आइसोलेसनमा छन् ।