राजविराज | सप्तरीको हनुमाननगर कंकालिनी नगरपालिकामा मंगलबार एकै परिवारका ८ सहित ११ जनामा कोरोना भाइरस (कोभिड-१९) संक्रमण पुष्टि भएको छ। हनुमाननगर कंकालिनी नगरपालिका -९ हनुमाननगर बजार निवासी व्यापारी परिवारका ३ महिलासहित ८ जनामा कोरोनो संक्रमण पुष्टि भएको स्वास्थ्य कार्यालय सप्तरीले जनाएको छ । 

नौ दिनअघि किरानालगायत विभिन्न समानका थोक व्यापारी २८ वर्षीय पुरुषमा संक्रमण पुष्टि भएपछि कन्ट्याक्ट ट्रेसिङका आधारमा परिवारका सदस्य र पसलका कामदारको साउन २८ गते स्वाब संकलन गरिएको थियो ।

परीक्षणमा उनको परिवारका आठजनाको रिपोर्ट पोजिटिभ आएको नगरपालिकाको स्वास्थ्य शाखाले जनाएको छ । स्वास्थ्य शाखाका जनस्वास्थ्य निरीक्षक रामदेव यादवका अनुसार परिवारका सदस्यमा कोरोना पोजिटिभ देखिए पनि पसलका कामदारको रिपोर्ट भने नेगेटिभ आएको छ । 

रिपोर्ट अनुसार एकै परिवारका १०, ३६, ३८, ५५ र ६५ वर्षीय पुरुष तथा २४, ३० र ५० वर्षीया महिला रहेका छन् । संक्रमित व्यापारी होम आइसोलेसनमा छन् । थप संक्रमण पुष्टि भएका ८ जना एकै परिवारका सदस्य भएकाले उनीहरुलाई पनि होम आइसोलेसनमै निगरानीमा राखिने यादवले बताए ।

एकै परिवारका ८ जनाबाहेक सोही नगरपालिकाका अन्य तीनजनामा पनि कोरोना संक्रमण पुष्टि भएको छ । वडा नम्बर १ का ४० वर्षीय पुरुष, वडा नम्बर ७ का ३१ वर्षीया महिला र वडा नम्बर १० का ४७ वर्षीय पुरुषमा कोरोना संक्रमित देखिएको स्वास्थ्य कार्यालय सप्तरीले जनाएको छ ।

योसँगै हनुमाननगर कंकालिनी नगरपालिकामा संक्रमित हुनेको संख्या ७७ पुगेको छ।जसमा ९ जना महिला छन् । त्यसअघि सोमबार राजविराज- ७ का ५४ वर्षीय एक कर्मचारी पुरुष र आइतबार छिन्नमस्ता गाउँपालिका-४ का १०, ३० र ५२ वर्षीय पुरुष, १८ र ४५ वर्षीया महिला तथा उमेर नखुलेका धनुषाको जनकपुर-४ का एक पुरुषमा कोरोना पुष्टि भएको थियो ।

उमेर नखुलेका पुरुष सप्तरीको दुई स्थानीय तहमा सञ्चालनको तयारीमा रहेको कृषि सम्बन्धी आयोजना क्लष्टर एकाई सप्तरीका प्रमुख हुन् । स्वास्थ्य कार्यालय सप्तरीका अनुसार हालसम्म सप्तरीमा ९७ महिला र ५८६ पुरुष गरी कुल ६८३ जनामा कोरोना संक्रमण पुष्टि भएको छ । जसमध्ये ४८ महिला र ४१२ पुरुष गरी कुल ४६० जना निको भएर घर फर्किएको गजेन्द्रनारायण सिंह अस्पतालले जनाएको छ ।

सप्तरीमा अहिलेसम्म ११ हजार ९४७ जनाको स्वाब संकलन गरिएकोमा १० हजार ५४१ जनाको पिसीआर परीक्षण भएको छ । गजेन्द्रनारायण सिंह अस्पताल राजविराजको प्रयोगशालामा मंगलबार ११५ जनाको परिक्षण गरिएको तथा सप्तरी र सिरहाको गरी झण्डै १ हजार ६ सय स्वाब परीक्षण प्रक्रियामा रहेको प्रयोगशालाका स्वास्थ्यकर्मीले बताए।