वीरगंज | प्रदेश २ मा ओरालो लागेको कोरोनाको ग्राफ पछिल्लो समय फेरि उकालो लाग्न थालेको छ । करिब ३ साता अघिसम्म संख्यात्मक हिसाबले दोस्रो अंकमै सीमित भएको संक्रमितको संख्या पछिल्लो समय दिनप्रतिदिन बढ्दै गएको छ ।

समाजिक विकास मन्त्रालयका अनुसार विभिन्न प्रयोगशालामा गरिएको पीसीआर परीक्षणमा सोमबार थप २ सय ११ जनामा कोरोना संक्रमण पुष्टि भएको छ । योसँगै संक्रमितको संख्या ७ हजार १ सय ७६ पुगेको छ ।

पछिल्लो २४ घण्टामा सबैभन्दा बढी बारामा १०६, पर्सामा २७, सर्लाहीमा १८, धनुषामा १७, महोत्तरीमा १४, सिरहामा ४ र रौतहट तथा सप्तरीमा ६/६ जनामा संक्रमण पुष्टि भएको स्वास्थ्य निर्देशनालयका जनस्वास्थ्य प्रशासक विजय झाले जानकारी दिए ।

मन्त्रालयले सार्वजनिक गरेको तथ्यांकअनुसार नयाँ संक्रमित भेटिएका मध्ये ५३ जना महिला छन् ।त्यस्तै, पछिल्लो २४ घण्टामा यस प्रदेशमा कोरोना संक्रमणबाट २ जनाको मृत्यु भएको छ ।

धनुषाको धनौजी गाउँपालिकाका ६५ वर्षीय १ पुरुषको प्रादेशिक अस्पताल जनकपुरमा, रौतहटको गौर नगरपालिका १ का ३२ वर्षीय पुरुषको संक्रमणबाट मृत्यु भएको निर्देशनालयका प्रशासक झाले बताए ।

मन्त्रालयका अनुसार यस प्रदेशमा हालसम्म संकलन गरिएको ८१ हजार ३ सय १६ जनाको स्वाबमध्ये ९ हजार १ सय ८९ जनाको रिपोर्ट आउन अझै बाँकी छ ।

पछिल्लो समय स्वाब संकलनको दायरा बढाइए पनि पीसीआर मेसिन अभावमा परीक्षणको दायरा भने बढ्न सकेको छैन । मन्त्रालयको तथ्यांकअनुसार गएको साता दैनिक १५ सयको दरले स्वाब संकलन भइरहे पनि करिब १ हजारको मात्र नतिजा दिने क्षमता रहेको उनको भनाइ छ ।

झाका अनुसार प्रदेश २ मा मात्र परीक्षणको भर परेर २ सातासम्म नतिजा आउने सम्भावना नरहेकाले विराटनगर, धरान, टेकु, धुलिखेल, हेटौँडालगायतका स्थानमा परीक्षणका लागि स्वाब पठाइने गरिएको छ ।

हाल प्रदेश २ मा प्रादेशिक जनस्वासथ्य प्रयोगशाला जनकपुर, नरायणी उपक्षेत्रीय अस्पताल वीरगञ्ज र गजेन्द्र नरायणसिंह सगरमाथा अस्पताल राजविराजमा मात्र पीसीआर मेसिन जडान गरिएको छ ।

थप ३ वटा रियल टाइम पीसीआर मेसिन खरिदका लागि समाजिक विकास मन्त्रालयले टेण्डर आह्वान गरेको जनस्वास्थ्य प्रशासक झाले जानकारी दिए । ती मेसिन खारिद भइसकेपछि मात्र स्वाब परीक्षणमा तीब्रता आउने उनको भनाइ छ ।