एजेन्सी । विश्व स्वास्थ्य संगठन, डब्लुएचओले अहिलेसम्मको अध्ययन अनुसन्धानमा खानेकुरा वा प्याकेजिङबाट भाइरस सर्न सक्ने कुनै प्रमाण नभएकाले यससबारे डराउनु नपर्ने बताएको छ ।
वास्तवमा बुधबार चीनको दक्षिण तर्फको सेन्जेन शहरमा ब्राजिलबाट निर्यात गरिएको फ्रोजन कुखुराको मासुको, बाहिरी प्याकेजिङ जाँच गर्दा कोरोना पोजेटिभ देखिएको खबर गरिएको थियो जसले यतिबेला मानिसहरुमा त्रास फैलाइरहेको बताइएको छ ।
तर अमेरिकाको सिडीसी र डब्लुएचओ दुवैले खानेकुराबाट भाइरस संक्रमण हुने सम्भावना अत्यन्तै कम रहेको बताउँदै आएका छन् ।
तापनि सेनजेनका स्वास्थ्य अधिकारीहरुले सो प्याकेजिङसँग सम्पर्कमा आएका सबै मानिसहरु तुरुन्तै पत्ता लगाएर परीक्षण गरेको हो जसमा सबैको नतिजा नेगेटिभ आएको बताइएको छ । यसबाहेक स्टकमा राखिएका अन्य सबै सम्बन्धित उत्पादनहरुको जाँच गर्दा पनि नेगेटिभ नै आएको खबर गरिएको छ ।
यस्तोमा आधिकारिक निकायहरुले सो मासुको प्याकेज भण्डारण गरि राखिएको पूरै क्षेत्रलाई ‘डिस्इन्फेक्ट’ गरि किटाणुमुक्त पारिसकेका छन् । यसमा सो प्याकेजिङमा कतिबेला र कहाँबाट भाइरस संक्रमित भयो भन्ने चाहिँ अझै स्पष्ट भएको छैन ।
यस सम्बन्धी डब्लुएचओका आपत्कालीन कार्यक्रम प्रमुख माइक रायनले भनेका छन्, “मानिसहरुले खानेकुरा, त्यसको प्याकेजिङ, प्रोसेसिङ या डेलिभरि गरिएका खानेकुरासँग डराउनुपर्ने कुनै आवश्यकता छैन । यस सम्बन्धी सबैले सुरक्षित र सहज महसुस गर्दा हुन्छ । किनकी हालसम्म भाइरस खानेकुराका माध्यमबाट सरेको कुनै प्रमाण छैन । ”
डब्लुएचओकै अर्की एपिडेमोलोजिस्ट मारिया भन करकोभका अनुसार महमारी सुरु भएदेखि चीनले सयौँ , हजारौँका सङ्ख्यामा बाहिरबाट आएका प्याकेजहरुको जाँच गर्दै आएको छ र यसमा एकदमै थोरै, दश भन्दा कम मात्र भाइरस पोजेटिभ भेटिएका छन् ।
त्यसैगरी यता ब्राजिलको कृषि मन्त्रालयले पनि चीनबाट आएको यो खबरको स्पष्टिकरण खोजिरहेको र अनुसन्धान भइरहेको जनाएको छ । आफूहरुले देश भित्र रहँदा सबै उत्पादनमा सावधानी अपनाउने गरेको तर सामानहरु बाहिर जाँदा त्यो कुन अवस्थामा हुन्छ भन्नेको चाहिँ जिम्मा लिन नसक्ने युकेडरका उत्पादन मन्त्री इभान ओन्टानेडाले संचार एजेन्सी रोएटर्ससँग बताएका हुन् । – रोयटर्स
