बीरगन्ज | पर्सामा चार महिलासहित ३४ जनामा संक्रमणको पुष्टि भएको छ ।बीरगन्जस्थित नारायणी अस्पतालमा गरिएको पछिल्लो परिक्षणको रिपोट अनुसार सबैभन्दा धेरै संक्रमित बीरगन्ज महानगरपालिकाका विभिन्न वडाका रहेका छन् ।
३४ जनामध्ये २७ जना बीरगन्ज महानगरपालिका, ३ जना पोखरिया नगरपालिका, एक जना जिराभवानी गाउँपालिका, २ जना बारा र एक जना सुर्खेतका छन् । संक्रमितहरु १४ वर्षदेखि ५६ वर्षसम्मका रहेका छन् ।
पछिल्लो संक्रमितमध्ये नेशनल मेडिकल कलेज र बयोधा अस्पतालका गरी दुई जना चिकित्सक रहेका छन् भने नारायणीमा काम गर्ने थप ४ जना स्वास्थ्यकर्मी संक्रमित भएका छन् ।
यस्तै, नेपाली सेनाका तीन सिपाही पनि संक्रमित भएका छन् भने फेरि एक जना पत्रकारमा पनि संक्रमण देखिएको छ । त्यसैगरी, वडा प्रहरी कार्यालयका एक जना थुनुवामा पनि संक्रमण देखिएको छ ।उता, बाराको फेटाका १ र कलैया उपमहानगरका १ गरी दुई जना संक्रमित भएका छन् ।