वीरगन्ज | कोरोना भइरसको उच्च जोखिममा रहेको वीरगन्जमा कोरोना संक्रमणका कारण १५ जनाको मृत्यु भएपछि बल्ल कोरोना अस्पतालको व्यावस्थापन गरिएको छ । कोरोना संक्रमण फैलिएको शुरुका दिनमा नारायणी अस्पतालमा छुट्टै पाँच वेडको आइसोलेसन बनाएर तयारी गरेपछि चैत ३० गते वीरगन्जमा पहिलो पटक तीनजनामा कोरोना संक्रमण देखा परेपछि पाँच वेडको आईसोलेसनमा राखेर उपचार सुरु गरिएको थियो

कोरोना संक्रमित विस्तारै बढ्दै गएपछि नारायणी अस्पतालको आकस्मिक बाहेक सबै सेवा बन्द गरेर त्यसैलाई नै कोरोना अस्पताल बनाएर ४४ जना संक्रमितलाई निको बनाएर घर पठायो । तर, त्यस बेलासम्ममा पनि वीरगन्जमा कोरोना अस्पताल स्थापना गर्न सकेन । महामारी संक्रमण नयाँ भएको र नेपालको शासकीय संरचनासमेत नयाँ भएकाले यस्तो महामारीको व्यावस्थापन कसले गर्ने भन्ने विषयमा देखिएको अन्योलता र यसभित्रै राजनीतिक दलहरूको चलखेलका कारणले वीरगन्जले अहिलेसम्म ठूलो क्षति व्यहोर्नु परेको छ ।

नेपाल सरकारको प्रतिनिधिको रुपमा रहेको जिल्ला संकट व्यावस्थापन केन्द्रले कोभिड–१९ संकट व्यावस्थापन केन्द्र (सीसीएमसी) को निर्देशन बाहेकका अन्य स्थानीय सरकार र प्रदेश सरकारसँग समन्वय गरेर गर्ने काम खासै प्रभावकारी नहुँदा वीरगन्ज कोरोना संक्रमणको उच्च जोखिममा परेको हो । लकडाउन कुखुलो भएको र सीमानाका बन्द भएपनि भित्री नाकाबाट लुकिछिपी रक्सोल वीरगन्ज आवात जावत गर्नेहरूका कारणले संक्रमण फैलिएको हो ।

पछिल्लो समयमा पर्सा क्षेत्र नम्बर १ का संघीय सांसद प्रदीप यादव, वीरगन्ज महानगरपालिकाका नगर प्रमुख विजयकुमार सरावगीलगायत समुदाय स्तरमा नै संक्रमण फैलिएर चिकित्सक, स्वास्थ्यकर्मी, कर्मचारी, सेना, प्रहरी समेत संक्रमित भएपछि भने जिल्ला संकट व्यावस्थापन केन्द्रले बल्ल अस्पतालको व्यावस्थापनमा पहल गरेको हो । वीरगन्जमा आइतबार बिहानसम्म ५०७ जना कोरोना संक्रमित मध्य १५ जनाको मृत्यु भईसक्दा बल्ल २५० बेडको कोरोना अस्पतालको व्यावस्था भएको छ ।

त्यसमध्य ५० बेडको अस्पताल यसअघि नै वीरगन्ज महानगरपालिकाले व्यवस्था गरेको हो । कोरोना भाइरसका कारण संक्रमीत बिरामीको उपचारका लागि वीरगंजमा करिव २ सय ५० बेडको आइसोलेसन वार्ड तयार भएको छ । बीरगंज महानगपालिकासँग भएको सम्झौताअनुसार गण्डक अस्पतालमा अहिले संक्रमितहरूलाई राखेर उपचार भईरहेको छ । यसको सम्झौताको लिखित म्याद सकिएपनि अस्पतालले मौखिक रुपमा थप ३ महिना कोरोना अस्पताल संचालन गर्न दिन सहमत भएको छ । त्यहाँ ७५ जना बिरामी भर्ना गरेर सेवा दिन सक्छ ।

समुदायस्तरमा संक्रमण फैलिएर संक्रमितको संख्या वृद्धि हुँदै मृत्युसमेत हुन थालेपछि जिल्ला संकट व्यावस्थापन केन्द्रको पहलमा करिब १ सय ५० बिरामीलाई भर्ना गरेर उपचार सेवा दिन सक्ने बीरगंज हेल्थ केयर अस्पताललाई नारायणी अस्पताल मातहत कोभिड अस्पताललाई जिम्मा लगाइएको छ । संघीय सरकारको मातहतमा रहेको नारायणी अस्पताललाई लेभल २ कोभिड अस्पतालको रुपमा संचालनमा ल्याउन पत्राचार गरेपछि अब वीरगन्जमा २५० वेडको आइसोलेसनको व्यवस्था भएको छ ।

यसअघि संकट व्यवस्थापन केन्द्र पर्साले सिफारिस गरे अनुसार वीरगञ्ज हेल्थ केयर हस्पिटललाई कोभिड अस्पताल सञ्चालन गर्न दिन मन्त्रलायले अनुमति दिएको छ । केन्द्रले गएको बिहिवार अस्पताल संचालन अनुमतीको माँग राखेर केन्द्रीय सीसीएमसी, गृहमंत्रालय, संघीय स्वास्थ्यमंत्रालय लगायतका सरोकारवाला निकाययलाई पत्राचार गरेको थियो ।

यसअघि स्थानीय सरकार वीरगन्ज महानगरपालिकाले खरिद गरेको पीसीआर मेशिनबाट मास टेष्टिङको लागि समन्वय गर्दा जिल्ला संकट व्यावस्थापन केन्द्रले कोभिड संकट व्यावस्थापन केन्द्रको अनुमति आवश्यक भएको भन्दै माथिल्लो निकायमा पठाएपछि पीसीआर परीक्षणमा ढिलो भएको थियो । संक्रमितहरूलाई राख्ने आईसोलेशन पहिले नै व्यावस्थापन नगरिएकोले परीक्षणपछि संक्रमितहरूको संख्या बढ्ने र यसले अझ चुनौती थपिने भएपछि संकट व्यावस्थापन केन्द्रले त्यसबाट आपूm बच्नका लागि सीसीएमसीको अनुमति लिन भनेको हो ।

अहिले केन्द्रीय तहले जिल्ला संकट व्यावस्थापन केन्द्र (डीसीएमसी) पर्साले पठाएको पत्रलाई एकैदिनमा आ–आफ्नो औपचारिक निकायबाट अनुमोदन गरेर अस्पताल संचालनको अनुमति दिएको हो । शुक्रबार एकै दिनमा यो सम्पूर्ण प्रक्रिया पुरा भएको थियो । यो सँगै नारायणी अस्पतालको ३ शैय्या भेण्टिलेटर ७ शैयाको आईसीयु, गण्डकमा १० शैयाको आईसीयु ३ शैयाको भेण्टिलेटर र वीरगन्ज हेल्थ केयरमा ३० शैयाको आईसीयु र ८ शैयाको भेण्टिलेटर गरी अब ४७ शैयाको आसीयु, १४ शैयाको भेण्टिलेटर गरी २५० शैयाको कोरोना अस्पतालको व्यावस्था भएको छ । कोरोनाको अस्पताल व्यावस्थापन भएपनि चिकित्सक र स्वास्थ्यकर्मीहरू नै संक्रमित भएपछि भने अब संक्रमितको उपचारमा स्वास्थ्यकर्मीहरूको भने अभाव हुन थालेको नारायणी अस्थायी कोभिड अस्पताल गण्डका कोअर्डिनेटर डाक्टर उदय नारायण सिंहले बताए ।नीरज पिठाकोटे -karobardaily