बीरगन्ज |पर्सामा थप ४५ जनामा कोरोनाभाइरस संक्रमण पुष्टि भएको छ । नारायणी अस्पतालको पिसीआर प्रयोगशालामा गरिएको परीक्षणमा वीरगञ्जका ४३ जना तथा सखुवा प्रसौनी गाउँपालिका र निर्मलबस्तीका एक–एक जनामा संक्रमण देखिएको अस्पतालका मेडिकल सुपरिन्टेनडेन्ट डा. मदन उपाध्यायले जानकारी दिए । संक्रमितमध्ये १४ जना महिला रहेका छन् ।
केही दिनअघि संक्रमण पुष्टि भएका वीरगञ्ज महानगरका मेयर विजय सरावगीको परिवारका सदस्यमा पनि संक्रमण देखिएको छ । कन्ट्याक्ट ट्रेसिङमा परेका सरावगीको परिवारका दुई सदस्यसहित ६ जनाको रिपोर्ट पोजेटिभ आएको छ भने अन्य ४ जनामा पनि संक्रमण देखिएको छ । अन्य संक्रमितको कन्ट्याक्ट ट्रेसिङमा परेका ३ जनामा पनि संक्रमण भेटिएको छ ।
यस्तै वीरगञ्जको बिर्तामा ५ देखि ६० वर्ष उमेर समूहका १९ जनामा संक्रमण पुष्टि भएको छ भने श्रीपुरमा मास टेस्टिङका क्रममा स्वाब संकलन गरिएका १० जनामा पनि संक्रमण देखिएको छ । आफैंले पैसा तिरेर पिसीआर परीक्षण गराएका दुईजना पुरुषमा पनि संक्रमण भेटिएको छ ।
पछिल्लो समय पर्सामा व्यापक रुपमा संक्रमण फैलिदैँ गएको छ । त्यसैकारण जिल्लाभर आगामी साउन १९ गतेदेखि अनिश्चितकालीन् निषेधाज्ञा जारी गरेर सेना समेत परिचालन गरिने भएको छ । साउन १० गतेदेखि वीरगञ्ज महानगरपालिकामा मात्रै निषेधाज्ञा लगाइएकोमा पछिल्लो परिस्थितिको विश्लेषण गर्दै जिल्लाभर विस्तार गर्ने निर्णय गरिएको जिल्ला सुरक्षा समितिले जनाएको छ ।
