चितवन । पूर्वी चितवनको कालिका नगरपालिका वडा नम्बर ८ मा होम क्वारेन्टिनमा बसेका एक वृद्धको मृत्यु भएको छ । स्वास्थ्य कार्यालय चितवनका अनुसार साउन ८ गते भारतबाट आएर होम क्वारेन्टिनमा रहेका ६९ वर्षिय वृद्धको शुक्रबार मृत्यु भएको हो । “उनी कसैलाई थाहा नदिई होम क्वारेन्टिनमा बसेका रहेछन्,” स्वास्थ्य कार्यालय चितवनका प्रमुख दीपक तिवारीले भने, “केही दिन पछिमात्र नगरपालिकामा जानकारी आयो ।”

उनको शुक्रबार दिउँसो घरमानै मृत्यु भएको थियो । मृत्यु पश्चात उनको स्वाब परीक्षणका लागि भरतपुर कोभिड १९ प्रयोगशालामा पठाइएको तिवारीले बताए  । उनका अनुसार मृत्यु भएका वृद्धको शव हाल भरतपुर अस्पतालमा राखिएको छ ।

उनी घर आएको विषयमा कसैलाई पनि जानकारी नगराइएको र आएको तीन दिन पछि मात्र समुदायले जानकारी पाएका थिए । त्यस पछि होम क्वारेन्टिनमा राखिएको थियो । कोरोना सम्बन्धि कुनै लक्षण नदेखिए पनि उनको स्वाब परीक्षणको नतिजा आएपछि मात्रै दाहा संस्कारको काम अगाडि बढाइने तिवारीले जानकारी दिए ।