पाल्पा | अविरल वर्षासँगै खसेको पहिरोले सिद्धार्थ राजमार्गका विभिन्न ठाउँमा मंगलबार बिहानैदेखि यातायात अवरुद्ध भएको छ  । तिनाउ गाउँपालिकाको सिद्धबाबा, पैठेडाँडा, ड्यामसाइड, गौडेपुलमा पहिरो खसेको प्रहरीले जनाएको छ ।

सिद्धार्थ राजमार्गअन्तर्गत पाल्पाको तिनाउ गाउँपालिका–३, ड्यामसाइड क्षेत्रमा खसेको पहिरो । मंगलबार बिहानै ५ बजेदेखि राजमार्ग अवरुद्ध भएको छ । राजमार्गकै पिपलडाँडा नजिकै सेरामा पहिरो खसेको पाल्पाका प्रहरी उपरीक्षक दीपक खरेलले बताए ।

सडक डिभिजनको समन्वयमा वर्षा रोकिनासाथ डोजर, लोडर लगाएर पहिरो खुलाउने प्रयास भइरहेको छ । अविरल वर्षासँगै खसेको पहिरोले पाल्पाका ग्रामीण भेग जोड्ने सडकसमेत अवरुद्ध भएका छन् । पहिरो पन्छाउन सडक डिभिजन बुटवल (हेभी कार्यालय) बाट मेसिन मगाइएको छ । पहिरो खसेपछि पाल्पादेखि स्याङ्जा–पोखरा र पाल्पा–बुटवल सडकमा सवारी साधन सञ्चालन हुन सकेको छैन ।