वीरगन्ज | पर्साको शंकरसरैया गाउँमा बर्थिङ सेन्टरसहितको स्वास्थ्य चौकी भवन निर्माण थालिएको ६ वर्ष बितिसकेको छ। तर ठेकेदारले अधुरै अवस्थामा काम छाडेर हिंडेपछि उक्त स्वास्थ्य चौकीको भवन निर्माण सम्पन्न भएर संचालनमा नआउँदै पुरानो भएको छ।

स्वास्थ्य चौकी निर्माणका लागि आफ्नो ५ कठ्ठा जग्गा दिएका स्थानीय रामचन्द्र महरा चमार भन्छन्,‘भवन अधुरै छाडेर ठेकेदार नै २ वर्षदेखि गायब छ । अहिले निर्माणाधीन भवन वरिपरि घाँस उम्रिएर झाडी भएको छ।  त्यहाँ गाउँका केटाहरुको गाजा चुरोट खाने, दिशा पिसाब गर्ने ठाउँ मात्र भएको छ।’

भवन अधुरो रहँदा स्वास्थ्य चौकी चार दशक पुरानो २ कोठाको जीर्ण भवनमा जेनतेन संचालन गरिएको वडा अध्यक्ष दारा सिंह राउत बताउँछन्। पुरानो साँघुरो भवन जीर्ण भएकाले उपचार सेवा पनि प्रभावित भएको स्वासथ्य चौकीका स्वास्थ्यकर्मीको गुनासो छ। ‘दुवै कोठा जीर्ण छन्। कति खेर छत खस्छ ठेगान छैन’ , अनमी प्रमीला देवी राउत भन्छिन्, ‘बरण्डामै बिरामी राखेर जाँच्नुपर्छ।  महिला बिरामीलाई अनुमानकै भरमा औषधी दिएर घर पठाइदिन्छौँ।’
स्वस्थ्य चौकी भवन अलपत्र परेकाले जटील अवस्थाका बिरामी र सुत्केरी गाराउन आउने महिलालाई उपचारै नगरी अन्यत्र पठाइदिने गरेको अनमी राउतले बताइन्।

जीराभवानी गाउँपालिका ५ शंकरसरैयामा १ करोड ५४ लाख रुपैयाँको लागतमा बर्थिङ सेन्टरसहितको स्वास्थ्य चौकी निर्माणको ठेक्का २०७१ सालमा दोलखाको शीवराम कन्ट्रक्शन प्रालिले सकारेको थियो। सघन शहरी तथा भवन निर्माण आयोजना र ठेकेदार कम्पनीबिच २०७१ जेठ २८ मा गरिएको सम्झौतामा २४ महिनाभित्रै (२०७३ जेठ २७ ) भवन निर्माणको कार्य सक्नु पर्ने उल्लेख थियो। तर ठेक्का लगाइएको ६ वर्ष बितेर ७ वर्ष लागिसक्दा पनि निर्माण कार्य अधुरै छ। २ वर्षदेखि ठेकेदार काम छाडेर हिंडेपछि निर्माणाधीन भवन अलपत्र परेको हो।

भवन अलपत्र रहे पनि ठेकेदार कम्पनीले ठेक्का सम्झौतामध्येको आधा रकम ६२ लाख ३६ हजार रुपैयाँ भुक्तानी भने लिइसकेको छ।

शीवरामकै ठेक्कामा परेको अरु २ भवन पनि अलपत्र

शंकरसरैया स्वास्थ्य चौकीको भवन अलपत्र पारेर छाडेको शीवराम कन्ट्रक्शनले नै ठेक्का सकारेर काम पूरा नगरेका पर्सा जिल्लाकै अन्य २ स्वास्थ्य चौकी भवन पनि अलपत्र परेका छन्। छिपहरमाई गाउँपालिकाको टिहुकीको स्वास्थ्य चौकी भवन ७ वर्षदेखि र पटेर्वासुगौली गाउँपालिका सुगौलीको स्वास्थ्य चौकी भवन ६ वर्षदेखि अलपत्र परेको हो ।

टिहुकीमा १ करोड २१ लाखको लागतमा स्वास्थ्य चौकी भवन निर्माणका लागि सघन शहरी तथा भवन निर्माण आयोजना र शीवराम कन्ट्रक्शनबीच २०७० अषाढ २७ मा ठेक्का सम्झौता भएको थियो। ठेक्का सम्झौतामा २४ महिनाभित्रै (२०७२ अषाढ २६ ) भवन निर्माण कार्य सम्पन्न गर्नु पर्ने उल्लेख थियो। तर ठेक्का सम्झौता भइ काम थालेको ७ वर्ष बितिसक्दा पनि टिहुकीको स्वास्थ्य चौकी भवन अधुरै रहेर अलपत्र परेको छ।

ठेकेदार कम्पनीले भने ९७ लाख रुपैयाँ भुक्तानी लगिसकेको छ। २ वर्षअघि ठेकेदारले भुक्तानी लिएर गएदेखि नै भवन निर्माणको काम रोकिएको स्थानीय बताउँछन्।

सुगौलीको स्वास्थ्य चौकी भवन निर्माणको ठेक्का सम्झौता २०७१ जेठ २८ गते भएको थियो। सम्झौतामा उक्त भवनको पनि निर्माण कार्य, ठेक्का लागेको २४ महिनाभित्रै (२०७३ असार २७ भित्र ) कम्पनि शीवराम कन्ट्रक्शनले सक्नुपर्ने थियो। ६ वर्ष बितिसक्दा पनि उक्त भवन अधुरै छ। उक्त भवनको ठेकेदार कम्पनीले भने ५० लाख ११ हजार रुपैयाँ भुक्तानी लिइसकेको छ।

सघन शहरी तथा भवन निर्माण आयोजनाको वीरगन्ज स्थित कार्यालयका इन्जिनियर अमरेन्द्र झाले शीवराम कन्ट्रक्शनले पर्सामा ठेक्का सकारेका ३ वटै स्वास्थ्य चौकी भवन अधुरो रही अलपत्र परेको बताए। ‘उसको ठेक्कामा परेको ३ वटै भवन अधुरै छन्’, उनले भने, ‘पटक-पटक म्याद थप्दा पनि उसले काम नगरेपछि कालो सूचीमा राखेर कारवाहीको प्रकृया अगाडि बढाएका छौं।’

बारम्बार मौखिक र लिखित चेतावनी दिंदासमेत कुनै सुनवाई नगरेपछि सार्वजनिक खरिद ऐन अन्तरगत कालो सूचीमा राखेर कारवाहीको प्रकृया अगाडि बढाइएको उनले बताए। उनका अनुसार शिवराम कन्स्ट्रक्सनले नै ठेक्का सकारेको पर्साको कालीकामाई गाउँपालिकाको भेडिहारीको उपस्वास्थ्य चौकी भवन निर्माणको सम्झौता पनि कार्यालयले २ वर्ष अगाडि नै भत्काएर नयाँ ठेक्का लगाएको थियो।क्रान्ति शाह