वीरगंज | एसईई परीक्षाको परीक्षाफल ढिलो प्रकाशित हुने भएको छ ।करीब ३० जिल्लाबाट प्राप्तांक नआइपुगेका कारण ढिलो हुने भएको हो ।निरन्तर बाढीपहिरोका कारण कर्णाली प्रदेशका ९ जिल्लाका कुनै पनि विद्यालयको प्राप्तांक पनिकामा पुग्न सकेको छैन ।सुदूरपश्चिम र १ नम्बर प्रदेशका पहाडी जिल्लाका केही जिल्लाका विद्यालयले अहिलेसम्म प्राप्तांक उपलब्ध नगराएका कारण परीक्षाफल प्रकाशित हुन ढिलो हुने भएको छ । परीक्षा नियन्त्रण कार्यालय (कक्षा–१०) ले करीब ३० जिल्लाबाट प्राप्तांक नपठाएका कारण ढिलो हुने देखिएको छ ।

परीक्षा नियन्त्रक रामराज खकुरेलले हालसम्म करीब ४५ जिल्लाबाट प्राप्तांक आइपुगेको जानकारी दिए । जिल्ला शिक्षा समन्वय समितिले प्राप्तांक पठाउनुपर्ने व्यवस्था छ तर बाढीपहिरोका कारण कर्णाली प्रदेशका कुनै पनि जिल्लाबाट नम्बर सहितको कागजात आएको छैन ।‘साउन १५ गतेभित्र परीक्षाफल प्रकाशित गर्ने तयारी गरिरहेका छौं, अहिलेसम्म केही जिल्लाबाट प्राप्तांक नआएकाले समस्या परेको छ,’ परीक्षा नियन्त्रक खकुरेलले नेपाल समाचारपत्रसँग भने ।

पनिकाले सबै समन्वय समितिले प्राप्तांक पठाएपछि विद्यालयको कोड, सिम्बोल नम्बर र सबै विषयको प्राप्तांक इन्ट्री गरेर परीक्षाफल प्रकाशित गर्ने प्रक्रिया शुरू गर्ने जनाएको छ ।विद्यालयले ३ पटक सञ्चालन गरेको परीक्षाको अन्तिम मूल्यांकन गरी त्यसको आधारमा अंक दिने र त्यसलाई इकाइले प्रमाणित गरी पनिकामा पठाउने व्यवस्था छ ।

मन्त्रिपरिषद्को बैठकले यो वर्षको एसईई परीक्षा विद्यालयलाई नै दिने निर्णय गरेको थियो । लगत्तै बोर्डले कार्यविधि तयार गरी परीक्षा प्रणाली शुरू गरेको थियो । पनिकाले २० गते विद्यालय र ३० गतेभित्र इकाइले अंक पठाउनुपर्ने गरी निर्देशन जारी गरेको थियो ।पनिकाले क्वारेन्टाइन भएको विद्यालय, जिल्ला बाहिरको प्रअ र कक्षाशिक्षक भएका कारण परीक्षाफल प्रकाशित गर्न कठिनाइ हुन सक्ने अड्कल गरेको थियो ।

तर करीब २ हप्तादेखिको अविरल वर्षाका कारण राजमार्ग बन्द भएको र विकट जिल्लामा हवाई मार्गसमेत सञ्चालन नभएकाले कर्णाली, सुदूरपश्चिम र प्रदेश १ का पहाडी जिल्लाका विद्यालयको उत्तरपुस्तिका पनिकामा आउन सकेको छैन ।

११ कक्षाको अधिकार विद्यालयलाई

राष्ट्रिय परीक्षा बोर्डले ११ कक्षाको परीक्षा लिने सम्पूर्ण अधिकार विद्यालयलाई नै दिने भएको छ । बोर्डले सो अधिकार सहितको कार्यविधि तयार गरेको छ । कार्यविधिमा ११ कक्षाको परीक्षा सञ्चालन र व्यस्थापन गर्न विद्यालयका प्रधानाध्यापकको संयोजकत्वमा वरिष्ठ शिक्षक र विषय शिक्षक रहेको ३ सदस्यीय समिति गठन गर्ने भएको छ । बोर्डले १० कक्षाको परीक्षाका लागि पनि सोही व्यवस्था गरेको थियो ।

बोर्डले ११ कक्षाको परीक्षाको अनुगमन गर्ने अधिकार आफ्नो मातहतमा राखेको छ । अब ११ कक्षाको परीक्षा लिने र लब्धांक प्रमाणपत्र दिने अधिकार विद्यालयलाई नै दिइएको कार्यविधिमा उल्लेख छ । ११ कक्षाको प्रयोगात्मक परीक्षा समेत विद्यालयले नै लिने भएको छ । अब १२ कक्षाको परीक्षा मात्र बोर्डले लिनेछ ।यसअघि बोर्डले ट्रान्सक्रिफ्ट बनाउँदा ११ र १२ कक्षाको ग्रेडलाई समेट्ने गरेको थियो । अब १२ कक्षाको मात्र ग्रेड राखेर ट्रान्सक्रिफ्ट वितरण हुनेछ ।

कार्यविधिमा गत वर्षको पूरक परीक्षाको संपरीक्षण गर्ने अधिकार बोर्डले लिएको छ । अब ११ कक्षाको परीक्षा ९ कक्षाकै जस्तो विद्यालयबाटै सञ्चालन हुने, विद्यालयबाटै लब्धांकपत्र दिइने छ । कार्यविधि पारित भएसँगै सबै विद्यालयलाई ११ कक्षाको परीक्षा लिने बाटो खुल्नेछ । नेपाल समाचारपत्र दैनिकमा समाचार छ ।