दुबई | संयुक्त अरब इमिरेट्सले (यूएई) ले पहिलो मिसनअन्तर्गत मंगल ग्रहमा एक यान प्रक्षेपण गरेको छ । ‘होप’ नाम दिइएको मिसनले जापानस्थित तनेगसिमा अन्तरिक्ष केन्द्रबाट एचटू–ए रकेटमार्फत प्रक्षेपण गरिएको हो । उक्त मिसनले करिब ५० करोड किलोमिटर दूरी तय गरेपछि मंगल ग्रहको मौसम र जलवायुबारे अध्ययन गर्ने जनाइएको छ ।

यसअघि गतसाता गरिएका दुइटा प्रयास खराब मौसमका कारण स्थगित भएको जनाइएको थियो । यूएई स्थापनाको ५० औं वार्षिकोत्सव अर्थात् सन् २०२१ को फेब्रुअरीमा होप मंगल ग्रहमा पुग्नेछ । ‘होप’ मिसनको नेतृत्व गरिरहेकी सराह अल अमिरीले रकेट पूर्ण सफलताका साथ प्रक्षेपण भएको भन्दै खुसी व्यक्त गरिन् । अमिरी यूएईको वैज्ञानिक परिषद्को अध्यक्ष तथा विज्ञान राज्यमन्त्री हुन् । उनका अनुसार मिसनलाई दुबईस्थित मोहम्मद बिन रसिद स्पेस सेन्टरबाट नियन्त्रण गरिनेछ ।

यसै महिना अमेरिका र चीनले पनि मंगल ग्रहमा छुट्टाछुट्टै यान प्रक्षेपण गर्दै छन् । यी राष्ट्रहरूको तुलनामा अन्तरिक्ष यान निर्माण तथा प्रक्षेपणमा यूएईको अनुभव निकै कम छ । तर पनि अमेरिका, रुस, युरोप तथा भारतले सफलता हासिल गरेको काममा सफलता पाउन यूएई प्रयासरत छ । अमेरिकीविज्ञको अनुभवी परामर्श पाएका यूएईका इन्जिनियरहरूले जम्मा ६ वर्षको अवधिमै परिष्कृत यान निर्माण गरेका हुन् ।

उक्त भूउपग्रह मंगल ग्रहको कक्षमा पुगेपछि यसले ग्रहको वातावरणले कसरी काम गर्छ भन्ने ताजा विवरणहरूको खुलासा गर्ने अपेक्षा पनि गरिएको छ । त्यसका साथै यसको सहयोगमा मंगल ग्रहमा पानीको अवस्थितिबारे पनि जानकारी लिन सकिने वैज्ञानिकहरूको भनाइ छ ।