वीरगञ्ज । सिमावर्ती शहर रक्सौलमा जिल्ला विपत् व्यवस्थापन समिति मोतीहारी पुन: लकडाउन घोषणा गरेको छ।एकजना सङ्क्रमितको मृत्युपछि मोतीहारी जिल्ला प्रशासनले लकडाउन घोषणा गरेको हो । साँझ ६ बजेदेखि बिहान सात बजेसम्म लकडाउन अवधि तोकिएको छ । यो अवधिमा सरकारी, गैरसरकारी मानिसहरूलाई भने परिचयपत्रको आधारमा आवागमन गर्न दिने बताइएको छ ।

यसका साथै पसलहरू भने साँझ ६ बजेसम्म मात्र खोल्न पाइनेछ । आइतवार पसल बन्द गर्न भनिएको छ । पसल सञ्चालनको समयमा सामाजिक दूरी बनाउनुपर्ने र अनिवार्यरूपमा मास्क लगाउनुपर्ने नियम जारी गरिएको छ ।मास्क नलगाएर पसल सञ्चालन गर्न नपाइने तथा सामान पनि खरीद गर्न नपाइने व्यवस्था गरिएको छ ।

सरकारी र निजी गाडीमा चालकबाहेक दुईजना मात्र बस्न पाउने र फुटपाथमा सञ्चालित सबैखाले पसल बन्द गर्ने निर्णय गरिएको छ। नियम उल्लङ्घन गर्नेलाई कानूनमा निर्दिष्ट सजाय हुने चेतावनी दिइएको छ । प्रतीक दैनिकबाट ।