वीरगञ्ज । वीरगञ्जका होटल तथा पर्यटन व्यवासायीहरुले व्यवसाय सञ्चालन गर्न पाउनुपर्ने माग गरेका छन् । उनीहरुले लकडाउनमा अन्य व्यवसाय खोल्न छुट दिए जस्तै होटल व्यवसाय पनि खोल्न पाउनुपर्ने माग राखेका हुन् ।कोरोना भाइरसबाट बच्नका लागि अपनाउनुपर्ने सुरक्षात्मक उपाय अपनाएर व्यवसाय सञ्चालनका लागि अनुमति दिन उनीहरुले सरकारसँग आग्रह गरेका छन् । बुधबार उनीहरुले जिल्ला प्रशासन कार्यालय र वीरगञ्ज महानगरपालिकालाई समस्या समाधानका लागि पहल गरिदिन आग्रह गरेका छन् ।
होटल तथा पर्यटन व्यवसायी संघ पर्सा वीरगञ्जका अध्यक्ष बुद्धि बहादुर पन्त (हरि)को नेतृत्वमा होटल तथा पर्यटन व्यवसायीहरु प्रशासन र महानगरपालिका पुगेका थिए । संघमा ३३ वटा होटल तथा पर्यटन व्यवसायी आवद्ध छन् ।प्रमुख जिल्ला अधिकारी विष्णु कुमार कार्की र महानगरपालिका प्रमुख विजय कुमार सरावगीले ज्ञापन पत्र बुझ्दै सरकारले अर्को आदेश जारी नगर्दासम्म खोलाउन नसक्ने बताएका छन् ।
होटल व्यवसायीले बुझाएको ज्ञापनपत्र माथिल्लो निकायमा पठाईदिने आश्वासन दुवै निकायले दिएको छ ।चार तारे लर्डस दियालो सहित वीरगञ्जमा ५० भन्दा बढी होटल छन् । जसमध्ये एक दर्जनको हाराहारीमा मात्रै घर मालिक र होटल सञ्चालक एकै व्यक्ति छन् । बाँकीले होटल भाडामा लिएर सञ्चालन गरिएको हो । घरबेटीले भाडा माग्न थालिसकेको र आफूहरुको आम्दानी नभएकोले तिर्न नसक्ने अवस्थामा रहेको व्यवसायीहरु बताउँछन् ।वीरगञ्जको दुईवटा होटललाई पेड क्वारेन्टिनको रुपमा सञ्चालनमा ल्याइएको छ भने दुईवटामा अस्पतालका कर्मचारीहरु बस्दै आएका छन् ।
संघका अध्यक्ष पन्तले कोरोना भाइरस विरुद्ध सावधानीका उपाय अपनाएर होटल रेष्टुरेन्ट व्यवसाय खोल्ने व्यवस्था मिलाइदिन आग्रह गरे ।‘अधिकांश व्यवसाय खुलेको छ, होटल रेष्टुरेन्ट बन्द छ । सञ्चालन खर्च यथावत नै छ,’ उनले भने, ‘तीन महिना भन्दा लामो समय बितिसक्यो, अब त निकास खोज्नै पर्छ भनेर रेष्टुरेन्ट खोल्ने वातावरण बनाइदिन आग्रह गरेका हौं ।’