काठमाडौं । पाँच नेताले धारणा राखेपछि बुधबार बसेको नेपाल कम्युनिस्ट पार्टी (नेकपा) स्थायी कमिटी बैठक स्थगित भएको छ।

प्रवक्ता नारायणकाजी श्रेष्ठका अनुसार योगेश भट्टराई, लीलामणि पोखरेल, मातृकाप्रसाद यादव, नन्दकुमार प्रसाईं र आमन्त्रित सदस्य पेशलकुमार खतिवडाले बुधबारको बैठकमा धारणा राखेका हुन्।

बुधबार निधन भएकी नेपाली कांग्रेसकी सांसद ज्ञानकुमारी छन्त्यालप्रति शोक व्यक्त गर्न जानुपर्ने भएकाले बैठक स्थगित भएको हो। प्रवक्ता श्रेष्ठ, नेता भीम रावललगायत नेताले शोक प्रस्ताव लगत्तै बैठक गर्नुपर्ने आवाज उठाए पनि उनीहरुको आवाजको सुनुवाइ बैठकमा नभएको एक नेताले जानकारी दिए।

पाँच नेताले बोलेपछि स्थगित भएको बैठक बिहीबार बिहान ११ बजे पुन बस्ने प्रधानमन्त्रीका प्रेस संयोजक एवम् नेकपा प्रचार विभागका उपप्रमुख सूर्य थापाले जानकारी दिए।

कुन नेताले के भने ?

स्थायी कमिटी बैठकको पाँचौ दिन मदन जयन्तीमा प्रधानमन्त्रीले दिएको अभिव्यक्ति र निर्वाचन आयोगमा दर्ताका लागि आवेदन परेको भनिएको नेकपा (एमाले)को विषयमा छलफल भएको छ।

आइतबार (असार १४ गते) बालुवाटारमा मदन जयन्तीका अवसरमा आयोजित कार्यक्रममा प्रधानमन्त्रीले  सरकार हटाउन भारत सक्रिय रहेको भन्ने विचारमाथि कटाक्ष गरेका छन्। प्रधानमन्त्रीको अभिव्यक्ति गलत भएको भन्दै लीलामणि, मातृका, पेशल र नन्दकुमारले प्रधानमन्त्रीको विकल्प खोज्नुपर्ने धारणा राखेका छन्।

त्यसैगरी नेताहरुले सोमबार (असार १५)  निर्वाचन आयोगमा दर्ताको लागि आवेदन परेको भनिएको नेकपा (एमाले) को सम्बन्धमा आवाज उठाएका छन्। उनीहरुले पार्टी एकता गरेर अघि बढ्नुको साटो यस्ता विषय सार्वजनिक हुनु गलत भएको धारणा राखेका छन्।

बैठकमा पर्यटनमन्त्रीसमेत रहेका स्थायी कमिटी सदस्य योगेश भट्टराईले भने मध्यस्थकर्ताको रुपमा बोलेका छन्। उनले पार्टीभित्र मिलेर जानुको विकल्प नभएको दाबी गरे। जिम्मेवार नेताले बोल्नुअघि सोच्नुपर्ने उनको भनाइ छ। उनले बुधबारको स्थायी कमिटी बैठक सुरु हुनुभन्दा अगाडि बालुवाटारमा प्रधानमन्त्री ओलीले छलफल गरेको बताउँदै गम्भीरतापूर्वक छलफल गरेर पार्टीलाई एकठिक्क बनाउनुपर्नेमा जोड दिए।

‘बिहान प्रधानमन्त्रीले छलफल गर्नु भएको छ। सबै नेताले आआफ्नो ठाउँबाट गम्भीरतापूर्वक छलफल गर्नुपर्छ’, भट्टराईले भने, ‘भाग्ने छुट कसैलाई छैन। आवश्यक भए सचिवालय बैठकमा बस्नुहोस्े, ठोस प्रस्ताव स्थायी कमिटीमा ल्याउनुहोस्। यो समय झगडा गर्ने होइन।’ 

‘अध्यक्षद्वयबीच हार्दिकता देखिएन’ 

मंगलबारको बैठकमा प्रधानमन्त्री एवम् पार्टी अध्यक्ष केपी ओलीलाई अर्का अध्यक्ष पुष्पकमल दाहाल ‘प्रचण्ड’ले राजीनामा भारतले नभएर आफूले मागेको बताएका थिए। प्रधानमन्त्रीको राजनीनामाका लागि  भारतले होटल र दूतावासमा छलफल सुरु गरेको भन्दै दिएको अभिव्यक्तिप्रति कटाक्ष गर्दै प्रचण्डले प्रधानमन्त्रीले यस्तो हल्का अभिव्यक्ति दिनु नहुने भन्दै आपत्ति जनाएका थिए।

प्रचण्डले प्रधानमन्त्रीको अभिव्यक्तिप्रति आपत्ति जनाएपछि मंगलबारको बैठकमै वरिष्ठ नेता झलनाथ खनाल, माधवकुमार नेपाल र उपाध्यक्ष वामदेव गौतमलेसमेत आपत्ति जनाएका थिए। सबै शीर्ष नेताले प्रधानमन्त्रीमाथि दबाब सिर्जना गरेपछि बुधबारको बैठकमा दुवै अध्यक्षसँगसँगै बसेका भए पनि हार्दिकता नदेखिएको नेताहरुले बताएका छन्।

‘महासचिव विष्णु पौडेलले सुरुमा नाम टिपाएका पाँच कामरेडलाई बोल्न अनुमति दिनुभयो’, ति नेताले भने, ‘सँगसँगै बसेपनि दुई अध्यक्षबीच हार्दिकता देखिएन। संसदमा सहभागी हुुनुपर्ने भन्दै बैठक स्थगित गरियो।’