वीरगंज संजालएजेन्सी । एसियाका सबैभन्दा सम्पन्नशाली व्यक्ति मुकेश अम्बानीले पहिलोपटक विश्वको सर्वाधिक धनीहरुको सूचीमा शिर्ष दशमा स्थान हासिल गरेका छन् । अम्बानी भारतको सबैभन्दा मूल्यवान् मानिने कम्पनी रिलायन्सका प्रमुख कार्यकारी अधिकृत हुन् । उनको कूल सम्पति हालैमा मात्र ६४.५ अर्ब डलर पुगेपछि उनले ओरेकलका ल्यारी एलिसन र फ्रान्सकी लोरियल प्रमुख फ्रेन्सोइज बेटेनकर्ट मेयेर्सलाई हराउँदै ९ औँ स्थान हासिल गर्न सफल भएको ब्लुमबर्ग बिलेनाएर इन्डेक्सले जनाएको छ ।
शीर्ष दशमा पर्न सफल अम्बानी एसियाका एक मात्र व्यक्ति हुन् । अम्बानीको नेतृत्वमा रिलायन्स, तेल र ऊर्जाको कम्पनीबाट रिटेल पसल, मोबाइल, ब्रोडब्यान्ड, डिजिटल प्लटेफर्म लगायत विभिन्न रुपले विस्तार हुँदै आजको स्थानसम्म आइपुगेको हो ।
यसअघि अम्बानीले रिलायन्सको डिजिटल प्रविधि जिओमा लगानी गरेको तीन महिनामै १६.५ अर्ब डलर आम्दानी गरेका थिए । यसबीच उनले रिलायन्सको तेल व्यापारमा धेरै चुनौतिहरुको सामना गर्नुपरेपनि सो उपलब्धी हासिल गरेका हुन् । हालै विक्री गरिएको शेयरका कारण यसअघि रिलायन्सले, कम्पनी ऋणमुक्त भएको पनि बताएको थियो । मार्चको अन्त्य सम्म रिलायन्स २१ अर्ब ऋणमा रिहेको बताइएको थियो । तर मार्चपछिदेखि कम्पनीको शेयर, १७.२ प्रतिशत अर्थात दुई गुणाले वृद्धि भएको हो । तर रिलायन्स उकासिँदै गए पनि कोरोना भाइरसको प्रभावका कारण भारतका अन्य कम्पनीहरुमा चाहिँ आर्थिक गिरावट जारी छ । सिएनएन
