चितवन । चितवनको भरतपुर अस्पतालबाट कोरोना संक्रमित ६ जना डिस्चार्ज भएका छन् । उनीहरुको कोरोना संक्रमण परीक्षण नै नगरी डिस्चार्ज गरिएको अस्पतालले जनाएको छ ।डिस्चार्ज हुनेमा नवलपुर देबचुली –१ र –१२ का दुई जना, विनयत्रिवेणी–६ नवलपुरका एक जना र भरतपुर महानगरपालिका–६ का तीन जना छन् । भारतमा क्यान्सरको उपचार गराएर फर्किएका भरतपुर ६ केशरवागका एक वृद्ध, उनकी श्रीमती र छोरासमेत डिस्चार्ज भएका छन् ।उनी भरतपुर अस्पतालमा २१ दिन बसेका थिए । यस्तैं, देवचुली–१२ का ४९ बर्षिय संक्रमित ३१ दिन र देवचुली नगरापालिका –१ का संक्रमित १५ दिन र विनयत्रिवेणी – ६ का संक्रमित २० दिन अस्पताल बसेका थिए ।

सरकारले गत जेठ २० गते जारी गरेको राष्ट्रिय जाँच परीक्षण निर्देशिका अनुसार कोरोना संक्रमित व्यक्तिहरुमा संक्रमण लक्षणमुक्त भएको तीन दिन र जम्मा भर्ना भएको १४ दिन पछि परीक्षण नगरी डिस्चार्ज गर्न निर्देशन दिएको थियो ।यस्ता बिरामीबाट कोरोना संक्रमण अरुमा सर्ने सम्भावना न्यून भएको हुँदा परीक्षण नगरी घर पठाइने अस्पतालका मेडिकल सुपरिटेण्डेन्ट डा. श्रीराम तिवारीले जानकारी दिए । मेसु तिवारीले कुनै पनि संक्रमण पुष्टि भएका बिरामीलाई दोहोर्‍याएर परीक्षण नगरिने बताए ।‘टेस्ट गर्न आवश्यक छैन भनेर मन्त्रालय र डब्लुएचओले भनेपछि फेरि परीक्षणको झञ्झन्टतिर लाग्नुपरेन’ मेसु डा. तिवारीले भने ‘यसले ल्याबमा अनाश्यक चाप, दवाब र खर्च भएन ।’भरतपुर अस्पतालका सूचना अधिकारी लिलाधर पौडेलले डिस्चार्ज भएका सबै जनालाई घरमा गएर थप १४ दिन क्वारेन्टाइनमा बस्नुपर्ने, सबै नियमको पालना गर्न सुझाव दिइएको बताए ।संक्रमितहरुलाई एक मिटरको दूरी कायम गरेर बस्न, साबुनपानीले पटकपटक हात धुन, पौष्टिक र सन्तुलित खानपान गर्न भनिएको सूचना अधिकारी पौडेलले बताए ।