वीरगन्ज | सरकारले पछिल्लो समय सरकारको विरोधमा सडक प्रदर्शन गरिरहेका समूहलाई कोरोना भाइरस (कोभिड–१९) को संक्रमणको विषयमा संवेदनशील हुन आग्रह गरेको छ। कोभिड–१९ संकट व्यवस्थापन समिति (सीसीएमसी) निर्देशक समितिले शुक्रबार सरकारविरुद्ध भइरहेको प्रदर्शनको विषयमा मुख खोलेको हो। समिति संयोजक उपप्रधान एवम् रक्षामन्त्री ईश्वर पोखरेलले विज्ञप्ति सार्वजनिक गर्दै यस्तो आग्रह गरेका हुन्। उनले आन्दोलन गर्दा संक्रमणको संवेदनशीलता ख्याल गर्न आग्रह गरेका हुन्। विज्ञप्तिमा सरकारले कोरोना नियन्त्रणका लागि गरेका प्रयासबारे उल्लेख गरिएको छ। ‘आफ्ना मागहरु राखी शान्तिपूर्ण रुपमा उपस्थित हुन पाउनु लोकतान्त्रिक अधिकारको विषय भएपनि सम्बद्ध सबैलाई अहिलेको अवस्था सामान्य नरहेको तथा कोरोना संक्रमणको उच्च जोखिममा रहेको अवस्थाप्रति गम्भीर र संवेदनशील हुन विशेष आग्रह गर्न चाहन्छौं’, विज्ञप्तिमा भनिएको छ।पोखरेलले नेपाली भूमी कालापानी, लिपुलेक र लिम्पियाधुरा समेटिएको नक्सा निशान छापमा राख्न हुन लागेको संविधान संशोधनको खुशी मनाउन आग्रह गरेका छन्। सरकारले लकडाउनको मोडालिटी परिवर्तन गरेकाले सामाजिक दूरी कायम गर्दै आफ्नो दैनिकीमा फर्कनसमेत अनुरोध गरेको छ।
प्रेस वक्तव्य
नेपाल सरकार
कोभिड-१९ संकट व्यवस्थापन संचालन केन्द्र (CCMC) निर्देशक समिति
विश्वका विभिन्न राष्ट्रहरुजस्तै नेपाल पनि यतिबेला कोरोना महामारीका विरुद्ध कठिन संघर्ष गरिरहेको छ । सरकारको योजना र आम नागरिकहरुको साथ सहयोगबाट हालसम्म हामीले कोरोना संक्रमणलाई धेरै हदसम्म प्रभावकारी नियन्त्रण गरिरहेको भए पनि केही समय यता संक्रमण बढ्दै गइरहेको र आगामी दिनमा यसमा थप वृद्धि हुने जोखिम देखिएको छ । जोखिमको यो विशेष स्थितिलाई ध्यानमा राख्दै विज्ञ, सार्वजनिक सञ्चारमाध्यम र आम नागरिकहरुबाट प्राप्त सुझावहरुलाई समेत ध्यानमा राख्दै कोरोना महामारी विरुद्धको योजनालाई थप प्रभावकारी बनाउन सरकार प्रतिवद्ध रहेको छ ।
कोरोनाको रोकथाम, नियन्त्रण र उपचारका लागि नेपाल सरकारको तर्फबाट विभिन्न शीर्षकमा निकासा भएको छ । प्रदेश सरकार र स्थानीय तहहरुले पनि आफ्ना कोषहरुबाट यस विषयमा खर्च गरेका छन् । सरकारबाट यसको समग्र फाँटवारी छिटै सार्वजनिक हुने नै छ । हाल नेपालले गरिरहेको पिसिआर टेस्ट दक्षिण एसियाका धेरै मुलुकहरुको भन्दा अधिक भए पनि सरकारले पिसिआर टेस्टको दायरा थप बढाउने निर्णय गरिसकेको छ । एक महिना यता विदेशबाट भित्रिने नेपालीहरुको संख्या ह्वात्तै बढेर क्वारेन्टिनहरुको व्यवस्थापनमा केही समस्या देखिएको भए पनि तिनको निरन्तर सुधार गर्दै जान सरकार प्रतिवद्ध रहेको जानकारी गराउँछौँ ।
यसै बीच, विभिन्न मागहरु राखी भइरहेका सार्वजनिक गतिविधिहरुप्रति नेपाल सरकार, कोभिड १९ संकट व्यवस्थापन संचालन केन्द्र (सिसिएमसी), निर्देशक समितिको गंभीर ध्यानाकर्षण भएको छ । आफ्ना मागहरु राखी शान्तिपूर्ण रुपमा उपस्थित हुन पाउनु लोकतान्त्रिक अधिकारको विषय भए पनि सम्बद्ध सबैलाई अहिलेको अवस्था सामान्य नरहेको र हामीहरु कोरोना संक्रमणको उच्च जोखिममा रहेको अवस्थाप्रति गंभीर र संवेदनशील हुन विशेष आग्रह गर्न चाहन्छौँ । लकडाउनलाई क्रमशः खुकुलो बनाउँदै जनजीवनलाई सहज अवस्थामा फर्काउने निर्णय भइसकेको परिप्रेक्ष्यमा सामाजिक दूरीलाई कायम राख्नु र संक्रमणको जोखिमलाई नियन्त्रण गर्न सहयोग गर्नु हामी सबैको दायित्व हो । थोरै पनि असावधानीले संक्रमणले भयावह महामारीको रुप लिन सक्ने खतराप्रति सजग हुन सम्बद्ध सबैमा आह्वान गर्दछौँ ।
हामी सबैलाई थाहा छ,भोलि नेपालको संसदबाट विशेष निर्णय हुँदैछ । लिम्पियाधुरा, लिपुलेक र कालपानी क्षेत्र समेटिएको नक्सालाई नेपालको निशाना छापमा प्रतिविम्वित गर्नेगरी प्रतिनिधिसभाले भोली गर्ने संविधान संशोधन सम्बन्धी निर्णय नेपालको इतिहासको एउटा महत्वपूर्ण क्षण हो । नेपाली जनताले लामो समयदेखि प्रतिक्षा गरिरहेको यस विशेष दिनलाई हार्दिक रुपमा स्वागत गर्न र सिंगो राष्ट यस विषयमा एक रहेको यथार्थलाई पुनःपुष्टि गर्न हामी सबै दाजुभाइ दिदीबहिनीहरुलाई हार्दिक अनुरोध गर्दछौँ ।
ईश्वर पोखरेल
उपप्रधानमन्त्री एवं रक्षामन्त्री तथा संयोजक सिसिएमसी, निर्देशक समिति
