बीरगन्ज | नवगठित जनता समाजवादी पार्टीको केन्द्रिय समितिमा पर्साबाट क्षेत्र नं. ४ का प्रतिनिधिसभा सदस्य लक्ष्मणलाल कर्ण र मुख्यमन्त्री लालबाबु राउत परेका छन् ।तर तत्कालिन संघीय समाजवादी पार्टीका जिल्ला अध्यक्ष तथा प्रभावशाली मानिएका क्षेत्र नं. १ का सांसद प्रदीप यादव भने केन्द्रिय सदस्यको सूचीमा परेका छैनन् ।

मधेश आन्दोलनको केन्द्रविन्दु मानिएको पर्सामा आन्दोलनलाई सशक्त बनाउन प्रभावकारी नेतृत्व प्रदान गरेका सांसद यादव केन्द्रिय सदस्यमा नपर्दा पर्सामा अहिले चर्चा परिचर्चा हुन थालेको छ ।तर पार्टी एकता हुनुअघि यादवसँगै असन्तुष्ट समूहमा रहेका रेणु यादव र इस्तियाक राई भने केन्द्रिय सदस्य बन्न सफल हुनुले यसलाई अर्थपूर्ण रुपमा हेरिएको छ ।

तत्कालीन पार्टी अध्यक्ष उपेन्द्र यादवसँग असन्तुष्ट हुदैं एउटै समूहका रहेका यादव र राईलाई केन्द्रिय सदस्य बनाउनु तर प्रदीप यादव भने केन्द्रिय सदस्यमा नपर्नुले पार्टी पर्साका नेता कार्यकर्ताहरुले विभिन्न शंका उपशंका गर्न थालेका छन् ।तत्कालीन पार्टीले जिल्ला अध्यक्ष पद समेत खोसेपछि थप असन्तुष्ट बनेका प्रदीप यादव, केन्द्रिय सदस्यमा नपरेपछि उनको आगामी कदम कस्तो हुन्छ चासोको विषय रहेको छ ।