भोजपुर | भोजपुरमा कोरोना संक्रमितको संख्या थपिएको छ । गत जेठ १३ गते रुपन्देहीको सुनौली नाकाबाट ल्याइएका ५ जनामा कोरोना भाइरस संक्रमण देखिएको हो । योसँगै भोजपुरमा कोरोना संक्रमित हुने संख्या ६ पुगेको छ ।

गत जेठ १७ मा उक्त सीमानाकाबाट उद्वार गरी ल्याइएका संखुवासभाका २ जनालाई कोरोना संक्रमण पुष्टि भएपछि संक्रमितसँग एउटै गाडीमा भोजपुर ल्याइएका ६ जनाको स्वाब धरानस्थित वीपी कोइराला स्वास्थ्य विज्ञान प्रतिष्ठान पठाइएको थियो । यसबाहेक अन्य नाकाबाट ल्याइएका ३४ जनाको स्वाब परीक्षणका लागि धरान पठाइएको थियो ।

संक्रमण पुष्टि हुनेमा सबैजना षडानन्द नगरपालिका ८ र १२ का क्रमशः १७, १९, २९, ३० र ३२ वर्षीय पुरुष रहेको प्रमुख जिल्ला अधिकारी बसन्तराज पुरीले जानकारी दिए । गत वैशाख ११ गते हतुवागढी गाउँपालिका ६, होम्ताङका २६ वर्षीय एक युवकमा कोरोना संक्रमण देखिएको थियो । उनी यसअघि नै निको भएर घर फर्किसकेका छन् । 

नेपालभारतको विभिन्न सीमानाकामा अलपत्र ४० जना नागरिकलाई अरुण गाउँपालिकाको जरायोटारस्थित ‘होल्डिङ एरिया’ सहितको क्वारेन्टाइनमा राखिएको छ ।