बीरगन्ज | पछिल्लो पटक पर्सा प्रहरीको निशानमा एक सरसफाईकर्मी परेका छन् । पर्सा प्रहरीको कुटाईबाट एक सरसफाईकर्मीको खुट्टा नै भाँच्चिएको छ । प्रहरीको कुटाईबाट सहकर्मीको खुट्टा भाँच्चिएपछि आजबाट सरसफाईकर्मी आन्दोलित भएका छन् । प्रहरी ज्यादती विरुद्ध सरसफाइकर्मी हडतालमा बसेपछि बीरगन्ज महानगरको सरसफाई शनिबारदेखि ठप्प भएको छ ।
पटक–पटक प्रहरीबाट अवरोध, दुर्व्यवहार र कुटपिट हुन थालेपछि सरसफाइकर्मी शनिबारदेखि फोहोर उठाउन छाडेर हड्तालमा बसेका हुन् । लकडाउन पालनाको बहानामा प्रहरीले सरसफाईकर्मीलाई पटक–पटक अवरोध गर्दै आएको सरसफाईकर्मी बताउँछन् । कोरोनाको महामारीमा ज्यान जोखिममा राखेर काम गर्ने सरसफाइकर्मीलाई प्रहरीले अहिलेसम्म चारपटक अवरोध र दुर्व्यवहार गरेको एक सरसफाईकर्मीले बताए ।
यसअघि पनि सन्चारकर्मीदेखि लिएर स्वास्थ्यकर्मी र सर्वसाधारण पर्सा प्रहरीको लाठीमा निशानाम परिसकेका छन् । लकडाउनको बहानामा केही हप्ता अघि बीरगन्ज बसपार्कमा प्रहरीको लाठी प्रहारबाट एक वृद्धको खुट्टा नै भाँच्चिएका थियो । त्यसअघि, बच्चालाई दुध लिन निस्केका सर्वसाधारण र उपचारका खटिएका स्वास्थ्यकर्मीलाई पर्सा प्रहरीले दुर्व्यवहार गरेको घटना पटक–पटक सार्वजनिक भएका थिए । यस्तै, पत्रकार तिवारी यादवमाथि पनि प्रहरीले दुर्व्यवहार गर्दा पत्रकारहरु पनि आन्दोलनमा उत्रिएका थिए ।
बारम्बार पर्सा प्रहरीबाट सर्वसाधारणदेखि लिएर स्वास्थ्यकर्मीदेखि लिएर संचारकर्मी पनि पिडित भइरहँदा प्रहरी प्रमुख गंगा पन्तले भने अहिलेसम्म मुख खोलेकी छैनन् । बसपार्कको घटनामा प्रदेश प्रहरीले संलग्न प्रहरीलाई प्रदेश कार्यालयमा तानेको बाहेक अन्य घटनामा केही कारवाही गरिएको छ्रैन । सन्चारकर्मी यादवको घटनामा पनि छानबिन गर्ने प्रतिबद्धता जनाएकी एसपी पन्तको छानबिन कहाँसम्म पुगेको हो अत्तोपत्तो छैन । मातहातका प्रहरीको बर्बरता बारम्बार दोहोरिदाँ समेत प्रहरी प्रमुखले कुनै कारवाही नगर्नु र छानबिनमा समेत कुनै चासो नदेखाउँदा एसपी पन्त आलोचित भइरहेकी छिन् ।nepalpostdaily
