वीरगंज संजाल
कैलाली । कैलालीको गौरीफन्टा नाकाबाट बिहीबार २५ सय मानिससँगै स्वदेश फर्किएका ४ जनामा कोरोना संक्रमण पुष्टि भएको छ । बिहीबार स्वदेश फर्किने क्रममा कोरोनाको लक्षण देखिएपछि सिधै कैलालीको सेती प्रादेशिक अस्पताल लगिएका २२ जनामध्ये ४ जनामा कोरोना संक्रमण पुष्टि भएको हो ।बाँकी १८ जनाको रिपोर्ट आउन बाँकी रहेको सेती प्रादेशिक अस्पतालकासूचना अधिकारी दिलिप श्रेष्ठले बताए ।सयौंको भिडमा रहेका व्यक्तिलाई कोरोना संक्रमण देखिएपछि अहिले सुदूरपश्चिम प्रदेशमा त्रास फैलिएको छ । बिहीबार सीमाबाट स्वदेश प्रवेश गरेका २४ सय ९८ जनामध्ये ६ सय जनाको मात्र र्यापिड डाइग्नोस्टिक टेस्ट विधिबाट कोरोना परीक्षण गरिएको थियो ।
शनिबार संक्रमण पुष्टि भएका चारै जना बैतडीको शिवनाथ गाउँपालिकाका हुन् । शिवनाथ गाउँपालिकाका–१ का २७ र २० वर्षीय तथा वडा नम्बर २ का २२ र ३० वर्षीय पुरुषलाई संक्रमण पुष्टि भएको उनले जानकारी दिए ।उनीहरु चारै जनाको सेती प्रादेशिक अस्पतालको आइसोलेसनमा छन् ।यसअघि शुक्रबार पनि सुदूरपश्चिम प्रदेशमा ५ जनामा कोरोना संक्रमणको पुष्टि भएको थियो । कैलालीको जानकी गाउँपालिकाका तीन जना, डडेल्धुराको परशुराम नगरपालिका एक जना र बैतडीको शिवनाथ गाउँपालिकाका एक जनालाई शुक्रबार संक्रमण देखिएको थियो । उनीहरुको टीकापुर, डडेल्धुरा र बैतडी अस्पतालमा उपचार भइरहेको छ ।
जोखिम बढ्यो
परीक्षणबिनै नेपाल प्रवेश गरी स्थानीय तहमा पठाइएकाहरुबाट सुदूरपश्चिममा कोरोना संक्रमण ब्यापक हुन सक्ने जोखिम बढेको प्रादेशिक स्वास्थ्य निर्देशनलयका प्रमुख डा. गुणराज अवस्थीले बताए ।‘यसले ठूलो जोखिम निम्त्याउन सक्छ’ उनले भने ‘अब त्यो भिडमा रहेका सबैको परीक्षण गर्न आवश्यक छ ।’ बिहीबार स्वदेश फर्केर विभिन्न स्थानीय तहमा पुगेकाहरुको खोजी सुरु गर्नुपर्ने अवस्थीले बताए ।
‘सबै स्थानीय तहले खोजी गर्नुपर्छ । स्थानीय तहले स्वास्थ्य कार्यालयलाई विवरण पेश गर्नुपर्छ’ उनी भन्छन् ‘त्यो भीडमा रहेकाहरुको खोजी हुन सकेन भने ठूलो समस्या हुन सक्छ । ’भारतमा कोरोनाको संक्रमण बढेपछि त्यहाँबाट आएकाहरु स्वास्थ्य परीक्षण बिनै गन्तब्यमा पुगिरहेका छन् । पछिल्लो एक सातामा मात्रै ८ हजार बढी नागरिक कैलालीको गौरीफन्टा नाकाबाट स्वदेश फर्किएका छन् । तीमध्ये ९५० जनाको मात्रै परीक्षण भएको छ ।
‘महाराष्ट्रबाट आएका धेरै छन् । उनीहरुबाट सबैभन्दा बढी जोखिम छ’ उनले भने, ‘अहिले हामीकहाँ जनशक्ति र सामग्री अभाव छ । मंगलबारसम्म सामग्री आइपुग्छ । त्यसपछि सबै जिल्लाको क्वारेन्टाइनमा रहेकाहरुको स्वास्थ्य परीक्षण हुन्छ ।’कञ्चनपुरको दोधरा–चाँदनी नाकाबाट एक सातामा १५ सय नागरिक भित्रिएको जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक रवीन्द्र पौडेलले बताए ।यो नाकाबाट शनिबार ४ सय ४१ जना र बिहीबार ७ सय ३९ जना स्वदेश फर्किएका पौडेलले बताए । यो नाकाबाट स्वदेश फर्किनेको पनि स्वास्थ्य जाँच भएको छैन ।
क्वारेन्टाइनमा बसेकाहरु त्रसित
गौरीफन्टा नाका हुँदै संक्रमितसँग आएका केही नागरिक अहिले बैतडीको शिवनाथ गाउँपालिकामा तयार गरिएको क्वारेन्टाइनमा छन् । उनीहरुको स्वास्थ्य परीक्षणको तयारी भइरहेको स्वास्थ्य कार्यालय बैतडीका प्रमुख योगेश भट्टले जानकारी दिए ।अहिले बैतडीमा १ हजार ४ सय १४ जना क्वारेन्टाइनमा छन् । सबैभन्दा बढी शिवनाथ गाउँपालिकाको क्वारेन्टाइनमा ४ सय ७५ जना रहेको भट्टले बताए । भारतबाट सँगै आएकाहरुलाई संक्रमण देखिएपछि उनीहरु पनि जोखिममा रहेको उनले बताए ।
