वीरगञ्ज । बाराको कलैयास्थित कोभिड अस्पतालले आफूहरुलाई तातोपानी समेत उपलब्ध नगराएको कोरोना संक्रमित बिरामीले गुनासो गरेका छन् ।पिउनको लागि पटक पटक तातोपानी माग्दासमेत अस्पतालले नदिएको उनीहरुको गुनासो छ ।‘पानीको पर्खाइमा बस्दाबस्दै घाँटी नै बसिसक्छ । तर पानी आउँदैन । अस्पतालले व्यवस्था गर्न नसक्ने हो भने बाहिरबाट मगाउँछौं भन्दा पनि बाहिरबाट कुनै चिज ल्याउने अनुमति छैन भनेर चिकित्सकहरुले जवाफ दिन्छन्,’ अस्पतालमा उपचाररत एक जना संक्रमितले अनलाइनखबरसँग भने ।
उनले थपे ‘अब त कोरोनाले भन्दा पनि पानी पिउनै नपाएर पो मरिन्छ कि भन्ने चिन्ता लाग्न थालेको छ ।’कोरोनासँग लड्नका लागि टाइम टेबलमा पोषिलो खानु आवश्यक रहेपनि खाजा र खाना समयमै पाउन नसकिएको उनीहरुले दुखेसो गरेका छन् ।कलैया अस्पतालमा दुई जना संक्रमित उपचाररत छन् । जसमध्ये एक जना प्रहरीका जवान छन् भने एक जना पत्रकार छन् ।संक्रमितमध्येका एक जनामा भने शरीर दुख्ने, स्वासप्रश्वासमा समस्या जस्ता लक्षण छन् । उनले आफूलाई स्वास्थ्यमा समस्या रहेकोबारे पटक पटक डाक्टरलाई जानकारी गराएको तर थप उपचारका लागि कुनै प्रयास नभएको गुनासो गरे ।
यहाँ उपचार सम्भव नभए अन्य सुविधायुक्त अस्पतालमा रिफर गरिदिन आग्रहसमेत गरेको जानकारी दिए ।‘आइसोलेसनको बेडमा सुतेर मात्रै त कोरोना जितिँदैन होला नि ? यसको लागि त पोषिलो खानुपर्ने होला । संक्रमितको मनोवल उच्च राख्न नियमित काउन्सिलिङको पनि आवश्यक होला नि ?,’ उनले भने, ‘मनोबल उच्च हुने भन्दा पनि यहाँ बस्दा त थप मानसिक पीडा हुने थालेको छ । बाहिरबाटै आफन्तलाई भनेर आवश्यक चिज मगाउँछु भन्दा पनि अनुमति छैन । सधैं यसरी कति दिन चल्छ । सम्बन्धित पक्षले ध्यान पुर्याउनु आवश्यक छ ।’
संक्रमितले अस्पतालमा तातो पानी पनि पिउन नपाएको रहेछ नि भन्ने जिज्ञासामा बाराका प्रमुख जिल्ला अधिकारी रुद्रबहादुर पण्डितले यसबारे अस्पतालसँग बुझेर थप व्यवस्थित पारिने प्रतिक्रिया दिए ।उनले भने, ‘दुई जना संक्रमितमध्ये एक जनाको स्वास्थ्यमा समस्या देखा परेको भन्ने सुनेको छु । उहाँलाई आत्मबल उच्च बनाउन भनेका छौं । अस्पतालको तर्फबाट कमी कमजोरीहरु भएका रहेछन भने डाक्टर सा’बसँग सल्लाह गरेर व्यवस्थापन मिलाउँछौं ।’onlinekhabar
