वीरगंज संजाल
वीरगञ्ज | नेपाल पत्रकार महासङ्घ पर्साले पत्रकार तिवारी यादवमाथि भएको प्रहरीको अभद्र व्यवहारविरुद्धको आन्दोलन जारी रहेको जनाएको छ।महासङ्घ पर्साका उपाध्यक्ष अनुप तिवारीले बुधवार विज्ञप्ति जारी गर्दै परिस्थिति अनुसार आन्दोलनको शैली मात्र परिवर्तन भएको जनाएको हो।
लकडाउनको पालना गर्दै आफूलाई अनुकूल हुने गरी आआफ्नो सञ्चारमाध्यम तथा सामाजिक सञ्जालमा कलम चलाएर आन्दोलन जारी राख्न उपाध्यक्ष तिवारीले सञ्चारकर्मीहरूलाई आग्रह गरेका छन्।सञ्चारकर्मीहरूलाई अति आवश्यक कामबाहेक घरबाट बाहिर ननिस्कन सचेत गराउँदै भीडभाड नहुने गरी सञ्चारकर्ममा पत्रकारहरू खटिएको अवस्थामा अवरोध सृजना नगर्न स्थानीय प्रशासनलाई आग्रह गरिएको विज्ञप्तिमा उल्लेख छ।
महासङ्घका दुईजना नारायणी अस्पतालको आइसोलेशनमा रहेका र उनीहरूको स्वास्थ्य अवस्था सामान्य रहेको जानकारी गराउँदै विज्ञप्तिमा त्यहाँ पनि उनीहरूले आफ्नो सञ्चार धर्म निभाएकाले सम्बन्धित निकायको गैरजिम्मेवारीपनको अन्त्य हुँदै आइसोलेशन वार्डको अवस्था सुधारोन्मुख रहेको विज्ञप्तिमा बताइएको छ।पर्सामा स्थानीय प्रशासन मनपरी गर्ने दाउमा रहेको आरोप लगाउँदै समाजका सबै पक्ष एकजुट भएर खबरदारी गर्न महासङ्घ पर्साले आह्वान गरेको छ ।
