वीरगंज संजालजनकपुरधाम | प्रदेश २ नेपालमा कोरोना भाइरुस (कोभिड-१९) संक्रमणको जोखिम बढ्दै गएको छ। पछिल्लो २४ घण्टामा चार जनामा थप संक्रमण पुष्टि भएसँगै संक्रमितको संख्या १३५ पुगेको छ। प्रदेशका आठै जिल्ला कोभिड-१९ को चपेटमा छन्। संक्रमण बढ्दै गएपनि परीक्षणको क्रम भने घट्दो छ।
संक्रमितको संख्या गुणात्मक रुपमा बढ्दै गएपछि परीक्षणको दायरा केही बढाइए पनि त्यो पर्याप्त नरहेको स्वास्थ्यकर्मी नै बताउँछन्। प्रदेशका आठ जिल्ला मध्ये पर्सामा सबैभन्दा बढी ९१ जना संक्रमित छन् भने सप्तरी र सिरहामा सबैभन्दा कम १÷१ जना संक्रमित छन्। त्यसैगरी रौतहटमा २२, बारामा ४, महोत्तरीमा ३ , धनुषामा ८ र सर्लाहीमा ३ जनामा संक्रमण पुष्टि भएको छ।
भारतबाट खुला सीमानाका भएकै कारण कोरोनाको जोखिम उच्च भएपनि परीक्षण अन्य प्रदेशको तुलनामा निकै कम रहेको छ। स्वास्थ्य तथा जनसंख्या मन्त्रालयको तथ्यांक अनुसार यस प्रदेशमा हालसम्म ९ हजार २ सय १६ जनाको मात्रै आरडीटी विधिबाट परीक्षण भएको छ भने पीसीआर परीक्षणका लागि ५ हजार ९ सय १६ जनाको स्वाब संकलन गरिएको छ। जसमध्ये १ हजार ५ सय ४४ जनाको रिपोर्ट आउन बाँकी नै छ।
प्रदेश २ सरकारले भने संघीय सरकारसँग समन्वय र सहकार्यको अभावमा स्वास्थ्य परीक्षणलगायत संक्रमण नियन्त्रणको लागि प्रभावकारी रुपमा अघि बढ्न नसकेको आरोप लगाएको छ।प्रदेशका आन्तरिक मामिला तथा कानुनमन्त्री ज्ञानेन्द्र यादव यस्तो महामारीको बेलामा पनि संघीय सरकारसँग उचित समन्वयको अभाव भएको बताउँछन्। तर, प्रादेशिक अस्पतालमा कोरोना परीक्षणसमेत हुन नसक्दा सबै संकलित स्वाब र परीक्षण रिर्पोटका लागि काठमाडौंकै भर पर्ने अवस्था छ।
प्रादेशिक अस्पताल जनकपुरमा दोस्रो पटक जडान गरिएको पीसीआर मेसिनबाट परीक्षण बन्द भएको छ। पछिल्लो पटक जडान गरिएको पीसीआर मेसिनले फरक नतिजा दिएपछि परीक्षण बन्द गरिएको हो। यसअघि राष्ट्रिय प्रयोगशालाले पठाएको पीसिआर मेसिनले भरपर्दो नतिजा दिन नसकेपछि नयाँ मेसिन जडान गरिएको थियो।
वैशाख २४ मा संकलित पत्रकारको स्वाब परीक्षण गर्दा प्रादेशिक अस्पतालस्थित पीसीआर मेसिनले नेगेटिभ नतिजा दिएको थियो। तर, राष्ट्रिय प्रयोगशाला टेकुमा परीक्षण गर्दा एक पत्रकारसहित दुईजनामा कोरोना पोजेटिभ देखिएपछि पीसिआर परीक्षण बन्द गरिएको हो। anpurnapost
