नेपालगन्ज |  बाँकेको दुर्गम नरैनापुर गाउँपालिकामा एक युवकको कोरोनाबाट मृत्यु भएको छ। नेपालमा कोरोनाबाट मृत्यु हुने उनी दोस्रो व्यक्ति भएका छन्।

जिल्ला स्वास्थ्य कार्यालय बाँकेका कोराना फोकल पर्सन नरेशबाबु श्रेष्ठका अनुसार नरैनापुर-५ नयाँ वस्ती घर भइ सोही वडाको दीपेन्द्र प्राविको क्वारेन्टाइनमा बसेका २५ वर्षका युवकको कोरोनाबाट मृत्यु भएको हो।

मृत्यु अघि नै शनिबार उनको कोरोना परीक्षणका लागि थ्रोट स्वाब संकलन गरिएको थियो। भेरी अस्पताल नेपालगन्जको कोरोना प्र्रयोगशालामा पीसीआर प्रविधिमा गरिएको परीक्षणमा आइतबार दिउँसो कोरोना पोजेटिभ भएको रिपोर्ट आएको थियो।

उनको मृत्यु कोरोनाबाट भएको संघीय सरकारको स्वास्थ्य तथा जनसंख्या मन्त्रालयका प्रवक्ता डा.विकास देवकोटाले नियमित पत्रकार सम्मेलनमा आइतबार पुष्टि गरेका थिए।

इलाका प्रहरी कार्यालय भगवानपुरका इन्चार्ज इन्सपेक्टर मानबहादुर विसीका अनुसार आइतबार बिहान ५:३० बजेतिर उनले वान्ता गरेका थिए। उनको ६ः४० मा निधन भएको थियो। उनलाई ज्वरो पनि आएको थियो।

भारतको मुम्बईबाट ३० वैशाखमा फर्केका उनी नरैनापुर ५ को दीपेन्द्र प्राविको क्वारेन्टाइनमा बसेका थिए। ३१ वैशाखमा उनीसँगै नरैनापुरका तीन सय ३३ जनालाई एकैदिन क्वारेन्टाइनमा राखिएको थियो। तिनैमध्येका ४५ जनाको कोरोना परीक्षण गर्दा शुक्रबार नरैनापुरका ८ जनामा कोरोना संक्रमण पुष्टि भएको थियो। पुष्टि भएकामध्ये ६ जना संक्रमित दीपेन्द्र प्राविको क्वारेन्टाइनमा बसेका व्यक्ति थिए। उनीहरुकै सम्पर्कमा रहेका दुई सय ६३ जना व्यक्तिहरुको कन्ट्याक्ट ट्रेसिङका आधारमा शनिबार कोरोना परीक्षणका लागि थ्रोट स्वाब संकलन गरिएको थियो। त्यसैमध्येका एक यी युवकको कोरोनाबाट मृत्यु भएको हो।

अहिले पनि नरैनापुरका दुई सय ६२ जनाको कोरोनाको रिपोर्ट आउन बाँकी छ। जसमध्ये दीपेन्द्र प्राविको क्वारेन्टाइनमा बसेका ३८ जनाको रिपोर्ट आउन बाँकी रहेको जिल्ला स्वास्थ्य कार्यालय बाँकेले जनाएको छ।

मृत्युको खबरले भीड बढ्यो 
क्वारेन्टाइनमा बसेका युवाको मृत्यु भएको खबर पाएपछि चार पाँच सयको संख्यामा स्थानीय क्वारेन्टाइन स्थलमा पुगेका थिए। प्रहरीले उनीहरुलाई नियन्त्रण गर्न हम्मेहम्मे परेको थियो। दिनभर पनि एक डेढ सयको संख्यामा स्थानीय सो क्षेत्रमा थिए। कोरोनाबाट मृृत्यु भएको थाहा पाएपछि मात्र स्थानीय घर फर्केको विसीले बताए।

नरैनापुर गाउँपालिकाका प्रमुख प्रशासकीय अधिकृत मणिराज खरालका अनुसार अहिले पनि नरैनापुर गाउँपालिकामा रहेका १३ वटा क्वारेन्टाइनमा ७ सय ५० भन्दा बढी व्यक्तिहरुलाई राखिएको छ। खरालले भने, ‘हरेक दिन भारतबाट आउने क्रम रोकिएको छैन। शनिबार मात्र ४० जना भारतबाट आएका थिए। आइतबार ९ जना आएका छन्। अझै चार पाँच सय जना आउने देखिएको छ।’