काठमाडौं | देशभर अहिलेसम्म ८१ हजार ६ सय ५९ जनामा कोरोना भाइरसको नमुना परीक्षण गरिएको छ। पीसीआरविधिमार्फत २१ हजार ३ सय ४० जनाको र र्‍यापिट डाइगोनोष्टिक टेष्ट (आरडिटी) मार्फत ६० हजार ३ सय १९ जना परीक्षण गरिएको स्वास्थ्य तथा जनसंख्या मन्त्रालयले जनाएको छ।

स्वास्थ्य मन्त्रालयका प्रवक्ता डा. विकास देवकोटाका अनुसार पछिल्लो २४ घण्टामा २ हजार ३ सय ५७ जनाको नमूना परीक्षण भएको छ। पछिल्लो तथ्यांक अनुसार नेपालमा अहिलेसम्म २ सय १९ संक्रमित मध्ये हालसम्म ३५ जना उपचारपछि डिस्जार्च भएका छन्।

संक्रमितमध्ये १ सय ७६ पुरुष र ४३ जना महिला छन्। प्रदेश अनुसार प्रदेश १ मा ३५, प्रदेश २ मा ९६ जना, बागमती प्रदेशमा ९ जना, गण्डकी प्रदेशमा २ जना, प्रदेश ५ मा ७२ जना, सुदूरपश्चिम प्रदेशमा ५ जना संक्रमित फेला परेका छन् । संक्रमित सबैको स्वास्थ्य अवस्था सामान्य रहेको मन्त्रालयले जनाएको छ।

कोरोनाको आशंका र संक्रमित गरी २ सय ४५ जना अस्पतालको आइसोलेसनमा रहेका छन्। जसमध्ये ६ जना काठमाडौं उपत्यकामा छन्। मुलुकभर हाल १४ हजार ३ सय १३ जनालाई क्वारेन्टाइनमा राखिएको मन्त्रालयले जनाएको छ।