काठमाडौं | राष्ट्रपति विद्यादेवी भण्डारीले बैशाख २६ गतेका लागि संसद्को बजेट अधिवेशन आह्वान गरेकी छन्। मन्त्रिपरिषद्ले आइतबार राष्ट्रपति समक्ष अधिवेशन आह्वानको सिफारिस गरेको थियो।

कोरोना संक्रमणबाट बच्न भन्दै सरकारले बैशाख २५ सम्म लकडाउन घोषणा गरेको छ। २६ गतेबाट बजेट अधिवेशन सुरु हुने भएकाले लकडाउन खुकुलो हुने अनुमान गरिएको छ। लकडाउनबीच अधिवेशन बस्न कठिनाइ हुने संसद्का अधिकारीहरू बताउँछन्। जेठ १५ गते बजेट सार्वजनिक गर्नुपर्ने संवैधानिक बाध्यता छ। गत वर्षभन्दा यसपटक १० दिन ढिलो गरी अधिवेशन बस्न लागेकाले बजेट पूर्वका तयारीका लागि समय चापाचाप हुने सचिवालयका कर्मचारी बताउँछन्।

बजेट अघि नीति तथा कार्यक्रम प्रस्तुत गर्ने, त्यसलाई पारित गर्नुपर्ने र १५ दिन अगावै प्रिबजेट छलफल सम्पन्न गर्नुपर्ने हुन्छ। सविधानको धारा ११९ को उपधारा (३) मा अर्थमन्त्रीले राजस्व र व्ययको अनुमान प्रत्येक वर्ष जेठ महिनाको १५ गते संघीय संसद्मा पेश गर्नुपर्ने व्यवस्था छ।

बजेट संघीय संसद्का दुवै सदनको संयुक्त बैठकमा प्रस्तुत गर्नुपर्छ। अधिवेशन आह्वान भएपनि सरकारले नीति तथा कार्यक्रम पहिले कि प्रिबजेट छलफल पहिले गर्ने भन्ने जानकारी संसद्लाई गराएको छैन। ‘यो विषयमा सरकारसँग कुराकानी हुन बाँकी छ’, संसद्का कार्यवहाक महासचिव गोपालनाथ योगीले भने।

संसद् बैठकमा अपनाउनुपर्ने स्वास्थ्य सुरक्षाका विषयमा केही दिनअघि स्वास्थ्य सेवा विभागका चिकित्सकले पनि संसद् भवनको निरीक्षण गरेका र उनीहरूले दिएका सुझाव कार्यान्वयनका लागि कार्यव्यवस्था परामर्श समितिमा राखिने कार्यवाहक महासचिव योगीले जानकारी दिए।

बजेट क्यालेण्डर र स्वास्थ्य सुरक्षाबारे छलफल गर्न केही दिनभित्रै कार्यव्यवस्थाको बैठक बसाउने तयारी भइरहेको सचिवालयले जनाएको छ।