काठमाडौं | लकडाउन अवधि भर इन्टरनेट सेवाहरु नकाटिने भएको छ ।नेपाल दूरसञ्चार प्राधिकरण (एनटीए) ले इन्टरनेट सेवा प्रदायकहरुलाई लकडाउन अवधिभर महशुल भुक्तानी नभए पनि सेवा बन्द नगर्न निर्देशन दिएको हो ।
निर्देशनपछि सेवा प्रदायकहरुले इन्टरनेट सेवा बन्द गर्न नपाउने भएका छन् । प्राधिकरणले हालको विषम परिस्थितिमा अत्यावश्यक सेवाहरु सूचारु राख्नुपर्ने बताउदै केही सेवा प्रदायकहरुले समयमा महशुल भुक्तानी नगरेको कारण सेवा अवरुद्ध गरेको गुनासो प्राप्त भएकोले यस्तो निर्देशन जारी गरेको जनाएको छ ।
एनटीएले ती सेवा प्रदायकहरुलाई सम्भव भएसम्म अनलाईन माध्यमबाट भुक्तानी लिने व्यवस्था गर्नसमेत भनेको छ । तर अनलाइन माध्यमबाट भुक्तानी गर्ने व्यवस्था भए पनि भुक्तानी गर्न असमर्थ भएका ग्राहकहरुको हकमा इन्टरनेट सेवा लकडाउन अवधिभर निरन्तर संचालन हुने व्यवस्था गर्नसमेत प्राधिकरणले भनेको हो ।
लकडाउनपछि शुल्क भुक्तानी गर्दा कुनै विलम्ब शुल्क लिन नपाइनेसमेत प्राधिकरणको निर्देशनमा उल्लेख छ । नेपाल दूरसञ्चार प्राधिकरणबाट इन्टरनेट, इमेल सेवा संचालन गर्न अनुमतिपत्र प्राप्त सबै सेवा प्रदायकका लागि भएको प्राधिकरणले स्पष्ट पारेको छ ।
यसले मोबाइल सेवा प्रदायकले दिने डाटा इन्टरनेट सेवालाई भने आकर्षित गर्दैन । प्राधिकरणका प्रवक्ता मीनप्रसाद अर्यालले लकडाउनको अवधिमा इन्टरनेटबाटै कार्य सञ्चालन गर्नुपर्ने र इन्टरनेटकै आधारमा दिन कटाउनुपर्ने अवस्थामा इन्टरनेट काटिदा र विभिन्न कारणले त्यसको भुक्तानी हुन नसक्दाको अवस्थामा हुन आउने समस्यालाई मध्यनजर गर्दै यस्तो निर्देशन जारी गरेकोे बताए ।
