रुकुम पश्चिम | आठबीसकोट–९ की नयना चन्दले नगरपालिकाले स्थापना गरेको कोरोना विपद् कोषमा १३ हजार रुपैयाँ जम्मा गरिन् । त्यही वडाका तेजबहादुर मल्लले १० हजार जम्मा गर्दा ग्वामे खत्रीले कोरोना आइसोलेसन वार्ड निर्माणका लागि डेढ लाख रुपैयाँको बालुवा सहयोग गरेका छन् ।
आठबीसकोट नगरपालिकाले बनाइरहेको १२ शय्याको कोरोना आइसोलेसन वार्ड निर्माणमा श्रमदान गर्न आएकाहरु । तस्बिर : हरि/कान्तिपुर
चौरजहारीका प्रेम सुनारले नगरपालिकामार्फत विपन्न मजदुरका लागि २५ किलोका ४० बोरा चामल वितरण गर्दा चौरजहारी अस्पतालले सय बोरा खाद्यान्न सहयोग गर्यो । दुई स्थानीय तह मात्र होइन, जिल्लाभरि कोरोना प्रतिकार्य योजनामा स्थानीय सरकार र सर्वसाधारणको साझेदारी चलिरहेको छ ।
आठबीसकोटले स्थापना गरेको विपद् कोषमा १०९ जनाले सहयोग गरेका छन् । सहयोग आउने क्रम जारी छ । नगरपालिकाले बनाउन लागेको कोरोना आइसोलेसन वार्ड निर्माणमा समेत स्थानीयको श्रमदान बढेको नगरप्रमुख गोर्खबहादुर केसीले बताए । ‘अहिले सरकार एक्लैले गरेर सम्भव नहुने अवस्था छ,’ उनले भने भने, ‘कोरोना फैलन नदिन सरकार र जनता सागसागै लागि परेका छौं ।’
नगर कार्यपालिकाबाट निर्णय भएलगत्तै व्यक्तिहरु सहयोगका लागि तयार भएको उनको भनाइ छ । उनका अनुसार व्यक्ति, सामुदायिक वन उपभोक्ता समूह र सहकारी विपद् नियन्त्रण अभियानमा छन् । १० दिनमा सक्ने गरी थालिएको कोरोना आइसोलेसन वार्ड निर्माणले गति लिएको उनले जनाए ।
चौरजहारीमा २५ जनाले नगरपालिकाको विपद् कोषमा नगद तथा जिन्सी सहयोग गरेका छन् भने मुसीकोट, बााफिकोट, सानीभेरी र त्रिवेणीमा पनि सहकार्य जारी छ । चौरजहारीमा कार्यरत कर्मचारी, स्वास्थ्यकर्मी तथा स्थानीयले विपद् कोषमा रकम जम्मा गर्ने क्रम बढेको निमित्त प्रमुख प्रशासकीय अधिकृत रामबहादुर केसीले बताए । ‘जसले जति सक्नुहुन्छ, सहयोग गर्नुभएको छ, नगरले पनि स्वीकारेको छ,’ उनले भने, ‘अन्य दातालाई पनि कोषमा रकम जम्मा गर्न आग्रह गरिरहेका छौं ।’
