काठमाडौं । पछिल्लो २४ घण्टामा कोरोनाका ८२ हजार २६२ नयाँ संक्रमितको पहिचान भएको छ । यो अघिल्लो २४ घण्टाको तुलनामा केही बढी हो । गत २४ घण्टामा ८० हजार ५७३ नयाँ संक्रमित थपिएका थिए ।

पछिल्लो २४ घण्टामा सबैभन्दा धेरै अमेरिकामा २९ हजार ८७५ जना नयाँ संक्रमित फेला परेका छन् । स्पेनमा ६ हजार २७८, जर्मनीमा ५ हजार ६३३, इटलीमा ३ हजार ८३६ तथा फ्रान्समा ३ हजार ८८१ कोरोनाका नयाँ संक्रमित थपिएका छन् ।

नेपालमा भने गत शनिबारबाट नयाँ संक्रमित थपिएका छैनन् । नेपालमा अहिलेसम्म ९ जनाको कोरोनाको संक्रमण देखिएकोमा एक जना उपचारपछि स्वस्थ्य भइसकेका छन् । बाँकी ८ जनाको उपचार भइरहेको र अवस्था सामान्य रहेको स्वास्थ्य मन्त्रालयले जनाएको छ ।

हालसम्म २ हजार ३६६ नमुना परीक्षण गरिएको छ भने अहिले आइसोलेसनमा १३४, क्यारेन्टाइनमा ८ हजार ५८० जना रहेका छन् । स्वास्थ्य मन्त्रालयका अनुसार रेडजोनमा १७५ रहेका छन् ।