रौतहट । रौतहट प्रहरीले अवैध रुपमा संचालन भइरहेको घरेलु मदिरा भट्टी नष्ट गरेको छ । इलाका प्रहरी कार्यालय चन्द्रनिगाहपुरको गस्ती टोलीले २ वटा अवैध घरेलु मदिरा भट्टी नष्ट गरेको हो ।प्रहरीले विशेष सुराकीको आधारमा जिल्लाको चन्द्रपुर नगरपालिका वडा नं ६ मिलनचोकमा रहेका ती भट्टी नष्ट गरेको जनाएको छ । सो स्थानबाट १ सय ५० लिटर मदिरा, मदिरा बनाउन प्रयोग गर्ने ६ सय ५० लिटर कच्चा पदार्थ र भाडाहरू समेत बरामद गरेको कार्यालय प्रमुख प्रहरी नायव उपरिक्षक हेमराज शाहीले जानकारी दिए ।

इलाका प्रहरी कार्यालय चन्द्रनिगाहपुरले अवैध घरेलु मदिराविरुद्ध अभियान सञ्चालन गरेको बताए । उनका अनुसार विभिन्न सवारी साधनमा राखेर अवैध मदिरा रौतहट सदरमुकाम गौरसम्म पुग्दै आएको छ ।चन्द्रपुर नगरपालिकाका विभिन्न इलाकाहरुबाट अवैध घरेलु मदिरा सवारीसाधनमा हालेर जिल्लाको सीमावर्ती क्षेत्रहरुसम्म पनि ओसारपसार हुँदै आएको छ । भारत सरकारले मदिरामा प्रतिबन्ध लगाएपछि ठुलो संख्यामा सीमावर्ती क्षेत्रका भारतीयहरु मदिरा सेवन गर्नको लागि नेपालमा आउने गरेका छन् । जसले गर्दा अवैध घरेलु मदिराको ओसारपसार बढेको पाइन्छ ।