बैतडी । बैतडीमा २७ विद्यार्थीहरु एसइई परिक्षा दिनबाट वञ्चित भएका छन् । ७५ प्रतिशत हाजिर नपुगेका कारण २२ छात्र र ५ छात्रा गरी २७ जाना बिद्यार्थीहरु परिक्षा दिनबाट वञ्चित भएका हुन् । शिक्षा विकास तथा समन्वय इकाई बैतडीका अनुसार ७५ प्रतिशत हाजिरी अनिवार्य हुनुपर्नेमा २७ जनाको हाजीरी नपुगेकाले मापदण्डअनुसार उनीहरू परिक्षा दिन अयोग्य भएका हुन् ।

यही चैत्र ६ गतेदेखि सञ्चालन हुने माध्यमिक शिक्षा परीक्षा एसइईमा बैतडीबाट ५ हजारभन्दा बढी परीक्षार्थी सहभागी हुने भएका छन् । नियमित, ग्रेड वृद्धि र प्राविधिक धारका गरी जिल्लामा ५ हजार ६९४ परीक्षार्थी परिक्षामा सहभागी हुने शिक्षा विकास तथा समन्वय इकाइ बैतडीका प्राविधिक सहायक एवँ सुचना अधिकारी पुष्कर राज शर्माले जानकारी दिनुभयाे । उहाँका अनुसार नियमित तर्फ २५ सय ५३ छात्र र २६ सय ४५ छात्रा गरी ५ हजार १ सय ९८ परिक्षार्थी रहेका छन् ।

त्यस्तै ग्रेड वृद्धितर्फ १ सय ७५ छात्र र ३ सय २१ छात्रा गरी जम्मा ४ सय ९६ परीक्षार्थी रहेका छन् । यस्तै प्राविधिक धारतर्फ नियमिति र ग्रेड वृद्धि गरी जम्मा १२४ जना परीक्षार्थी रहेका छन् । जसअन्तरगत ९१ छात्र र ३३ छात्रा रहेका सुचना अधिकारि शर्माको भनाइ छ ।

चैत्र ६ गते बाट सञ्चालन हुने परीक्षाका लागि जिल्लामा २६ वटा परीक्षा केन्द्र निर्धारण गरिएको छ । ग्रेड वृद्धि गर्ने र प्राविधिक धारका विद्यार्थीहरुको परीक्षा भने वीरेन्द्र मावि शाहिलेकमा हुने शर्माले बताउनुभयाे । जिल्लाभित्र रहेका ११९ सामुदायिक विद्यालय ४ वटा संस्थागत र १ खुल्ला गरी कुल १२४ विद्यालयका विद्यार्थीहरु एसइई परीक्षामा सामेल हुने बताइएको छ ।