वीरगञ्ज । वीरगञ्ज रक्सौल नाकामा शनिबार साँझ नियमित भन्दा बेग्लै दृश्य देखियो । एक जना व्यक्ति दुवै हातमा ज्वरो नाप्ने डिजिटल मेसिन लिएर मानिसहरुको निधार नजिकै पुर्‍याउँथे । एक जनाकोमा दुईचार सेकेन्ड जति राखेपछि दौडेर अर्कोमा पुग्थे । नजिक आएजतिको ज्वरो नाप्न उनलाई चटारो थियो । उनी थिए हेल्थ असिस्टेन्ट अहेब अमिताव आलम ।

वीरगञ्ज महानगरपालिकाले सीमा क्षेत्रमा कोरोना भाइरसको संक्रमण नभित्रियोस भनेर हेल्थ डेक्स राखेको छ । केहिदिन यता आलम हेल्थ डेस्कमा कार्यरत छन् । ड्युटीमा रहेका अहेब दिपेन्द्र प्रसाद खाजा खान गएका कारण हेल्थ डेस्कमा रहेको दुईवटै ज्वरो नाप्ने मेशिन उनको हातमा परेको हो ।

मोतिहारीबाट निजी कारमा नेपाल आएका रणधित कुमारले गाडीबाट ओर्लेरै ज्वरो नपाए । ‘हामीतिर कोरोनाको संक्रमण छैन, तर यहाँ सतर्कता अपनाइएको रहेछ । त्यसैले मैले पनि ज्वरो नाप्न लगाए’ उनले भने, ‘सतर्कता अपनाउनु जरुरी छ ।’

वीरगञ्जकै रञ्जन कुमार गुप्ता मोटरसाइकलमा रक्सौल आउजाउ गरिरहन्छन् । शनिबार पनि दुईतीन पटक ओहोर दोहोर गरे । तर उनको एकपटक पनि ज्वरो नापिएन । ‘भीड देखेपछि मोटरसाइकल रोकेर हेर्न आएको हुँ’ उनी भन्दै थिए । उनले रक्सौलतर्फ कोरोनालाई लिएर कुनै प्रकारको जाँच नहुने गरेको बताए ।

वीरगञ्ज-रक्सौल नाकाबाट दैनिक हजारौंको संख्यामा मानिसहरु ओहोरदोहोर गर्छन् । टेप्पो, ईरिक्सा, टाँगा, बस मात्रै होइन, निजी सवारी साधनमा मानिसहरु आउँछन् । उनीहरुको सबैको चेकजाँच गर्नु दुई जनाले भ्याउने अवस्था छैन । तर आफूहरुले भ्याएसम्म सबैको ज्वरो नापेको स्वास्थ्यकर्मीहरु बताउँछन् ।हेल्थ डेस्क स्थापना भएदेखि शनिबारसम्म ६ सय ६३ जनाको मात्रै स्त्रिmनिङ भएको थियो । सबैमा शरीरको तापक्रम सामान्य पाइएको छ ।

पुरानो अध्यागमन कार्यालयमा रहेको हेल्थ डेस्कलाई ५० मिटर उत्तर तर्फ पहिला एभरेष्ट बैंकको एटीएम राखेको ठाउँमा सारिएको छ । ‘पहिला भन्दा डेस्क थोरै व्यवस्थित छ’ अहेब गुप्ताले भने ‘प्रदेशबाट १० थान ग्लोभ्स लगायत समान आएको छ ।’वीरगञ्ज महानगरपालिका सामाजिक महाशाखा प्रमुख अरुण महतो स्वयं जनशक्ति र ज्वरो मापन गर्ने मेशिनको संख्या थप्नुपर्ने देखिएको बताउँछन् । ‘कोरोना भाइरसको जोखिम बढ्दै गएको छ, हेल्थ डेस्कमा दुईवटा मात्रै ज्वरो नाप्ने मेशिन छ’ उनले भने ‘जनशक्ति पनि अझै आवश्यक देखिन्छ ।’

शनिबार नै स्वास्थ्य मन्त्रालय स्वास्थ्य सेवा विभागका जनस्वास्थ्य अधिकृत रामजी बानियाँ, प्रदेशका तर्फबाट विजय कुमार झा, नारायणी अस्पतालका मेडिकल सुपरीटेन्डेन्ट मनोज उपाध्याय लगायतको टोलीले हेल्थ डेस्कको निरीक्षण गरेका छन् ।