राैतहट । रौतहटमा ७ वर्षिया बालिका बलात्कृत भएकी छन् । जिल्लाकाे फतुवा विजयपुर नगरपालिका ११ घर भई हाल गुजरा नगरपालिका १ बस्दै आएकी बालिका बलात्कृत भएकी हुन् ।

उनलाई गुजरा नगरपालिका १ कै १४ बर्षिय नाबालकले बालिकालाई शनिबार साँझ बलात्कार गरेको आरोप बालिकाकी आमाले लगाउनुभएकाे छ । उहाँले आराेपित बालक विरूद्व ईलाका प्रहरी कार्यालय चन्द्रनिगाहपुरमा किटानी जाहेरी दिनुभएकाे इलाका प्रहरी कार्यालय चन्द्रनिगाहपुरले जनाएको छ ।

पीडित बालिकालाई ती बालकले गुजरा- १ मा पर्ने बहुवरि शाखा नहरमा लगी बलात्कार गरेपछि बालिका रोएकाे सुनेर स्थानीयले उद्वार गरेकाे पीडितकी आमाले बताउनुभयो । स्थानीयलाई देख्नेबित्तिकै पीडक फरार भएको बताउँदै उहाँले दाेषी उपर कडा कारवाहीकाे माग गर्नुभयो ।

आराेपित बालकलाई प्रहरी चाैकी रंगपुरकाे टाेलीले पक्राउ गरी इलाका प्रहरी कार्यालय चन्द्रनिगाहपुर समक्ष बुझाएको छ । पीडित बालिकाको चन्द्रनिगाहपुर अस्पतालमा स्वास्थ्य परिक्षण गरि अभिभावककाे जिम्मा लगाइएको प्रहरीले जनाएको छ ।

घटनाको थप अनुसन्धान भईरहेको र चाँडै थप जानकारी सार्वजनिक गरिने ईलाका प्रहरी कार्यालय चन्द्रनिगाहपुरका प्रहरी नायब उपरीक्षक हेम बहादुर शाहीले बताउनुभयो । आराेपित नाबालक भएकाले नाम सार्वजनिक गर्न नमिल्ने उहाँले बताउनुभयो । News24