सर्लाही । सर्लाही प्रहरीले चोरीको मोटरसाइकल सहित दुईजनालाई नियन्त्रणमा लिएको छ । सोमबार जिल्लाको ब्रम्हपुरी गाउँपालिका वडा २ धर्मपुरका राम एकवाल रायको आफ्नै घर अगाडी पार्किङ गरि राखिएको BR 30Q 6524 नम्बरको मोटरसाइकल  सोही गाउँपालिका र वडाबाट दुइजना चोर सहित बरामद भएको प्रहरीले जनाएको छ ।

पक्राउ पर्नेमा इश्वरपुर नगरपालिका वडा नम्बर ९ (रामनगर) बस्ने जोगेन्द्र साह तेलीका २२ वर्षिय छोरा राम प्रवेश साह र साह सँगै चोरीको मोटरसाइकलमा पछाडी बसेका मलंगवाका  अर्का एक युवक रहेको जिल्ला प्रहरी कार्यालय मलंगवाले जनाएको छ ।

प्रहरीको तदारुकताले सोमबार दिउँसो पौने २ बजे चोरी भएको मोटरसाइकल जाहेरी परेको २ घण्टामै बेलुका ४ बजे चोर सहित बरामद भएको हो । पक्राउ परेका दुवैजनालाई जिल्ला प्रहरी कार्यालय मलंगवाको हिरासतमा राखेर थप अनुसंधान भइरहेको प्रहरीले बताएको छ ।

जिल्लामा अहिले मोटरसाइकल चोरको बिगबिगी बढेको छ ।उनीहरूले जिल्लाका विभिन्न ठाउँबाट चोरी गरेका मोटरसाइकलहरु सिमावर्ती भारतीय बजार सोनवर्षा, कन्हौली, मेजरगंज लगायतका मोटरसाइकल बनाउने ग्यारेज र कवाडी गोदाममा लगेर बिक्री गरेको श्रोतले जनाएको छ ।चोरी गरेर सिमापारी पुर्याइसकेका बाइकको कवाडमा लगेर एकएक पार्टपुर्जाहरु निकालेर बेच्ने गरेको जनाइएको छ । mahottaripost