बारा । बाराको जितपुर–सिमरा क्षेत्रका स्थानीयवासी उद्योगधन्दाको धुँवा तथा धुलोमा बस्‍न बाध्य भएका छन् ।

सरकारले कुन क्षेत्रमा उद्योगधन्दा चलाउन अनुमति दिने, कुन क्षेत्रमा मानव बस्ती बसाल्दा उपयुक्त हुन्छ भन्ने अवधारणा नल्याउँदा स्थानीयवासी धुँवा, धुलोमा बस्‍न बाध्य भएका हुन् ।

जितपुर–सिमरा क्षेत्रमा सञ्चालित उद्योगधन्दाका कारण निस्कने धुलो तथा धुँवाले आजित भएका स्थानीयवासी र उद्योगी–व्यापारीबीच यस विषयमा पटक–पटक छलफल भएको भए पनि त्यसको निचोड अहिलेसम्म पनि निस्कन सकेको छैन । जसकारण यस क्षेत्रका उद्योगधन्दाबाट निस्कने धुँवा धुलोले यस क्षेत्रका स्थानीयवासी चिन्तित बनेका छन् ।

यस विषयलाई लिएर उद्योगी र स्थानीयवासीबीचको पटक पटको विवादमा स्थानीय प्रहरी प्रशासन मौन बस्‍नुले झन् समस्या ल्याउने वीरगञ्ज उद्योग वाणिज्य सङ्घका वरिष्ठ उपाध्यक्ष सुवोध गुप्ताले बताए ।

बारा र पर्सा जोड्ने व्यापारिक मार्गका उद्योगीले पनि सरकारबाट आवश्यक सहयोग र सुरक्षा नपाएको गुनासो गरेका छन् । मुलुककै अर्थतन्त्रको मेरुदण्डको रूपमा यो व्यापारिक मार्गको प्रयोग हुने गरेको भए पनि सरकारले यस मार्गलाई विशेषरूपमा हेर्न नसकेको भन्दै उनीहरुले असन्तुष्टि जनाएका हुन् ।

मुलुककै अर्थतन्त्रको मेरुदण्डलाई सरकारले उपेक्षा गरेको उनीहरुको आरोप छ । साथै साना तथा ठूला व्यापार–व्यावसायलाई सरकारले एउटै नजरले हेर्ने गरेका कारण पनि स्थानीय उद्योगीहरुको मनोबल घट्ने गरेको उद्योग वाणिज्य सङ्घ बारा शाखा जितपुरका सल्लाहकार गणेशप्रसाद साहले बताए ।

ठूलो पूँजी र धेरै जनशक्तिको प्रयोग गरेर उत्पादन गर्ने उद्योग र साना तथा थोरै जनशक्तिमा पनि सञ्चालन हुने उद्योगी तथा व्यवसायीलाई एउटै नियमले बाँध्‍न खोजे साना उद्योगीमा निराशा आउने साहको भनाइ छ । औद्योगिक नगरीको रूपमा परिचित जितपुर–सिमरा क्षेत्र विगतको तुलनामा केही सुरक्षित बन्दै गएको भए पनि आवश्यक मात्रामा सुरक्षित हुन नसकेको उद्योगीले बताएका छन् ।

सरकारले मुलुककै अर्थतन्त्रको मेरुदण्डका रुपमा रहेको यस क्षेत्रका व्यापारी व्यावसायी तथा उद्योगीको मनोबल बढाउने गरी सुरक्षा व्यवस्था गरी त्यसलाई निरन्तरता दिँदै अझ प्रभावकारीरूपमा अगाडि बढाउनुपर्ने व्यापारीको सुझाव छ । यसका लागि बारा र पर्साका सुरक्षा निकायको बीचमा समन्वय र छलफल निरन्तर हुनु आवश्यक रहेको उनीहरुले बताए ।

यस क्षेत्रमा सञ्चालित उद्योगधन्दाबाट निस्कने प्रदूषण र धुँवाधुलोका कारण आफूहरु हैरान भएको भन्दै स्थानीयवासीले पटक–पटक स्थानीय प्रशासनसँग आग्रह गरिरहेको भए पनि कुनै सुनुवाइ नभएको स्थानीय पवनकुमार सिंहले बताए ।

प्रदूषण नियन्त्रण तथा उद्योग अनुगमनको जिम्मा स्थानीय सरकारलाई दिएको भए पनि स्थानीय सरकार तथा स्थानीय प्रहरी प्रशासनले अनुगमनको नाममा अनुगमन मात्र गरेको तर त्यसलाई कार्यान्वयन गर्नेतर्फ ध्यान नदिएको स्थानीय विदुर खड्काले बताए ।

केही दिन पहिला पनि स्थानीय सरकार र स्थानीय प्रहरी प्रशासनले यस क्षेत्रका उद्योगको अनुगमन गरेको तर त्यसको परिणाम केही नआएको उनको भनाइ छ । साथै यो समस्या कुनै नयाँ नभएर पुरानै भएको र यो समस्या समाधान पनि नहुने स्थानीयवासीको भनाइ छ । रासस