काठमाडौं । भोजपुर, षडानन्द नगरपालिका–११ का कृष्णबहादुर बस्नेत भारतले नाकाबन्दी लगाउनु अगाडि प्रमुख भन्सार अधिकृतका रुपमा विराटनगर भन्सार कार्यालय पुगे । झण्डै दुई वर्ष काम गरेका उनले २०७४ मा विराटनगर छाडे । उनले विराटनगर छाड्दा राम्रै धन कमाएर गएको चर्चा थियो ।

त्यसपछि तातोपानी भन्सारमा पुगेका उनी अख्तियार दुरुपयोग अनुसन्धान आयोगको नजरमा परे । छानबिनका क्रममा २०४५ सालमा लेखापालबाट सार्वजनिक सेवा प्रवेश गरेका बस्नेतले साढे १० करोड रुपैयाँ अवैध सम्पत्ति जोडेको भेटियो ।यति मात्र होइन, उनीविरुद्ध विराटनगरमा हुँदा १७ लाख घुस लिएको अर्को मुद्दामा परेको छ ।

काटमाडौं–४ धुम्बाराही बस्ने बस्नेत उपसचिव हुन् । अख्तियारका अनुसार सेवा प्रदेश गरेदेखि २०७६ असार मसान्तसम्म उनको समग्र आयव्यय तथा लगानी विश्लेषण गर्दा १ करोड ७८ लाख २० हजार ९७५ रुपैयाँ ८२ पैसा देखिएको छ । यसमा पारिश्रमिक बचत, घरजग्गा बिक्री, ऋण सापटी, घर बहाल, शेयर लाभांश, कृषि आय, भ्रमण भत्ता, सुन बिक्री, अंशबण्डाबाट प्राप्त आय, कमिशन तथा पुरस्कार र बिमा सबै जोडिएको छ । यो अवधिमा उनको खर्च तथा लगानी ३ करोड १३ लाख ५९ हजार ७९३ रुपैयाँ ७३ पैसा देखियो ।

आय भन्दा व्यय १ करोड ३५ लाख ३८ हजार ८१७ रुपैयाँ ९१ अधिक देखिएको अख्तियारले जनाएको छ । प्रमुख भन्सार अधिकृत रहँदा बस्नेतले विदेशबाट नेपाल आयात गर्ने सामानहरुको भन्सार छुटाउँदा घुस लिने गरेको अख्तियारको दाबी छ । अनुसन्धानका क्रममा उनले विराटनगरमा रहँदा क्यारिङ व्यवसायीसँग १७ लाख घुस लिएको भेटियो । यो उनीविरुद्ध अर्को मुद्दा बन्यो ।

भन्सारमा बस्दा घुस लिएको रकम भने उनले खाँदबारी–१ संखुवासभाका जेठान नविनकुमार गौली र उनको परिवारका सदस्यहरुको नाममा लुकाएको भेटिएको छ । यस्तो रकम ९ करोड २१ लाख ५२ हजार ७९२ रुपैयाँ भएको अख्तियारको दाबी छ ।

‘कतिपय रकमहरु कृष्णबहादुर बस्नेतले विभिन्न व्यक्ति तथा कम्पनीमा नगदै बुझाउने र सम्पत्ति शुद्धिकरण गर्ने र लुकाउने उद्देश्यले कम्पनीकै नामको बैंकको चेक एवं कम्पनीमा कार्यरत कर्मचारीमार्फत समेत नबिनकुमार गौलीले प्राप्त गर्ने गरी चेक तथा नगद जम्मा गर्ने गरेको समेत पाइयो’ अख्तियारको विज्ञप्तिमा भनिाएको छ ।

घुस लिएको रकमलाई वैध बनाउन बस्नेतले जेठान गौलीको नाममा जग्गा जमिन खरिद गरी बकसको रुपमा फिर्ता लिने गरेको समेत अनुसन्धानका क्रममा खुल्यो । कतिपय रकम भने होटल र अन्य व्यवसायमा समेत लगानी गरेको भेटिएको छ ।

बस्नेत विराटनगर भन्सारमा रहँदा गौलीले खाँदबारी बजार र आसपास क्षेत्रमा करिब १०० रोपनी जग्गा खरिद गरेका थिए भने करिव १० करोड लागतमा आरती होटल बनाए । अर्बिट इनर्जी प्रालिमा २ करोड रुपैयाँ भन्दा बढी लगानी गरे । यसरी गरेको लगानीमा गौलीले ऋण, कृषि आय, जग्गा बिक्रीलगायतबाट भएको आयको तुलनामा निकै अस्वाभाविक देखिएको अख्तियारको ठहर छ ।

बस्नेतले १० करोड ५६ लाख ९१ हजार ६०९ रुपैयाँ ९१ पैसा गैरकानूनी सम्पत्ति आर्जन गरेको ठहर गर्दै अख्तियारले शुक्रबार विशेष अदालतमा मुद्दा हालेको छ । बस्नेतको स्रोत नखुलेको सम्पत्ति बराबर बिगो कायम गरिएको छ ।

उपसचिव बस्नेतको अकुत सम्पत्ति लुकाउन मतियार बनेको आरोप लागेका जेठान गौलीको हकमा ९ करोड २१ लाख ५२ हजार ७९२ रुपैयाँ विगो कायम गरिएको छ र, बस्नेतलाई सरह सजाय हुनुपर्ने अख्तियारको मागदाबी छ ।

यस्तै बस्नेतकी श्रीमती सबिता गौली बस्नेत, गौलीकी श्रीमती सकुन्तला र छोरा शुलभलाई समेत मुद्दामा प्रतिवादी बनाइएको छ । बस्नेतले घुस लिएको रकम जेठानले पाउने गरी सकुन्तला गौली र शुलभ गौलीको नाममा रहेको बैंक खाताहरुमा समेत पठाउने गरेको र उनीहरुकै नाममा चल अचल सम्पत्ति खरिद गर्नुका साथै होटल व्यवसायमा लगानी गरेको पाइएको भन्दै अख्तियारले उनीहरुलाई पनि अकुत सम्पत्तिको मुद्दामा प्रतिवादी बनाएको छ ।