हिउँद सुरू भएसँगै आगलागीका घटना बढे, एकै दिन साढे ६५ लाख बढीको क्षति
वीरगंज संजाल
२३ मंसिर २०७६, सोमबार १३:३८
३६८१
सुख्खायाम सुरु भएसँगै मुलुकमा आगलागीका घटना बढेका छन्। एकै दिन देशका सात स्थानमा भएको आगलागीका कारण ६५ लाख ६७ हजार रुपैयाँभन्दा बढीको क्षति भएको छ।काठमाडौं, ललितपुर, सिन्धुपाल्चोक, मुगु, सिराहा, पर्सा र कास्कीमा भएका आगलागीका घटनामा उक्त क्षति भएको हो।
प्रहरीकाअनुसार काठमाडौं महानगरपालिका–२६ ठमेल नर्सिङ चोकस्थित चेङ्दु होटलको भान्सा कोठामा विद्युत् सर्ट भई आइतबार दिउँसो आगलागी हुँदा भान्सा कोठा र स्टोर रूममा रहेका विभिन्न सामान जलेर करिब २० लाख रुपैयाँ बराबरको धनमाल नष्ट भएको छ।
ललितपुरको गोदावरी नगरपालिका–१३ झरुवाराशीस्थित पर्सा वीरगन्ज घर भएका ४१ वर्षीय महेश साहको टहरामा रहेको बा९३प ६६१ नम्बरको मोटरसाइकलमा आइतबार राति आगलागी हुँदा मोटरसाइकल साथै ग्याँस सिलिन्डर ३ थान, भाँडावर्तन, कपडा र टहरा जलेर करिब १० लाख रुपैयाँ बराबरको धनमाल नष्ट भएको प्रहरीले जनाएको छ।
यसैगरी सिन्धुपाल्चोकको चौतारा साँगाचोकगढी नगरपालिका–५ स्थित जिल्ला कारागार कार्यालय प्रमुख बस्ने निवास र कार्यालयसमेत रहेको जस्ताको तीन कोठे ट्रसको भवनमा करेन्ट सर्ट भई आइतबार दिउँसो आगलागी हुँदा कार्यालयका फर्निचर, सामान र घर पूर्णरूपमा जलेर करिब १५ लाख रुपैयाँ बराबरको धनमाल नष्ट भएको छ।
मुगुको छायाँनाथ रारा नगरपालिका–१३ रुघा बस्ने विर्ख लावड र ज्वाला लावडको घरमा आइतबार दिउँसो आगलागी हुँदा दुवैजनाको घर तथा घरभित्र रहेका लत्ताकपडा, अन्नपातलगायत सामान जलेर करिब ६ लाख रुपैयाँ बराबरको धनमाल नष्ट भएको प्रहरीले जानकारी दिएको छ।
यता सिरहाको लक्ष्मीपुरपतारी गाउँपालिका–५ खरुक्याही बस्ने मोहमद ईनुस मियाको घरमा आइतबार दिउँसो आगलागी हुँदा करिब ६ लाख ६७ हजार रुपैयाँ बराबरको धनमाल जलेर नष्ट भएको छ। साथै, उक्त आगो निभाउने क्रममा घाइते भएका छिमेकी २५ वर्षीय नवसाद अन्सारीलाई उपचारको लागि लहानतर्फ पठाइएको छ।
पर्साको वीरगन्ज महानगरपालिका–२७ जसौली गाउँ बस्ने हरेन्दर महत्तो कोइरीको २ वटा कुखुरा फार्ममा आइतबार राति आगलागी हुँदा फार्म तथा पार्किङ गरी राखेको ना२प ६०२ नम्बरको मोटरसाइकल र २ वटा साइकल पूर्णरुपमा जलेर करिब ८ लाख रुपैयाँ बराबरको धनमाल नष्ट भएको छ।
कास्कीको पोखरा महानगरपालिका–९ नयाँबजार बस्ने ६४ वर्षीय विनोद गुप्ताको मोटरसाइकल ग्यारेज र कोठामा विद्युत् सर्ट भई आइतबार साँझ आगलागी हुँदा ग६प ३९३३ नम्बरको स्कुटर र ग११प ११७५ नम्बरको मोटरसाइकल पूर्णरुपमा जलेर नष्ट भएका छन्।
स्थानीयबासी तथा दमकलको सहयोगमा आगलागी नियन्त्रणमा लिनुका साथै यस सम्बन्धमा प्रहरीले आवश्यक अनुसन्धान गरिरहेको छ।
वीरगंज संजाल
