नेपालगञ्ज | मोटरसाइकलले ठक्कर दिँदा गस्तीमा हिँडिरहेका दुई प्रहरी गम्भीर घाइते भएका छन् । सुर्खेतबाट नेपालगञ्जतर्फ आउदै गरेको भे ९ प ५२६३ नम्बरको मोटरसाइकलले ठक्कर दिँदा गस्तीमा हिँडिरहेका प्रहरी नायव निरीक्षक (सई) प्रमोदकुमार गुप्ता र प्रहरी जवान गणेशकुमार सुनार गम्भीर घाइते भएका हुन् ।

सई गुप्ताको कमाण्डमा चार जना प्रहरी गस्तीमा निस्केका थिए । सुर्खेतबाट नेपालगञ्जतर्फ आउदै गरेको मोटरसाइकलले चिसापानी बजारमा ठक्कर दिएको थियो ।

मोटरसाइकलको ठक्करबाट घाइते भएका सई गुप्ता र प्रहरी जवान सुनारलाई कोहलपुर मेडिकल कलेजले नेपालगञ्ज रिफर गरेको छ । नेपालगञ्ज मेडिकल कलेजमा उनीहरुको उपचार भइरहेको छ ।

दुर्घटनामा मोटरसाइकल चालक जनकबहादुर माझी र पछाडी बसेका रमेश पन्त पनि घाइते भएका छन् । मंगलबार पौने सात बजे गस्तीमा निस्केको प्रहरी टोलीलाई मोटरसाइकलले ठक्कर दिएको थियो ।