काठमाडौं | प्रहरीको केन्द्रीय अनुसन्धान ब्यूरो सिआइबीको टोलीले काठमाडौं उपत्यकाका विभिन्न ठाउँबाट वन्यजन्तुका हाडछाला (अखेटोपहार)सहित १३ जनालाई पक्राउ गरेको छ।

वन्यजन्तुको अखेटोपहार बेचबिखन तथा ओसारपसार गर्न लागेको भन्ने सूचनाका आधारमा सिआइबीको वन्यजन्तु हेर्ने पिलरबाट खटिएको टोलीले उनीहरुलाई पक्राउ गरेको हो। पक्राउ परेका सबैलाई कारबाहीका लागि डिभिजन वन कार्यालय हात्तिसार पठाइएको सिआइबीले जनाएको छ।

पुस ६ गते काठमाडौंबाट २ थान सालकको छालासहित चारजनालाई सिआइबीले पक्राउ गरेको थियो। पक्राउ पर्नेमा महोत्तरीको बर्दिबास नगरपालिका– ५ का ६० वर्षीय सिंहबहादुर मोक्तान, मकवानपुरको बकैया गाउँपालिका– २ का ४६ वर्षीय कालबहादुर जिम्बा, धादिङको खनियाबास गाउँपालिका– ३ का २८ वर्षीय सुके तामाङ र धादिङकै त्रिपुरासुन्दरी नगरपालिका–३ का २४ वर्षीय उमेश अधिकारी छन्।

यसको अघिल्लो दिन सिआइबीको टोलीले भालुको पित्त १ थानसहित ५ जनालाई पक्राउ गरेको थियो। पक्राउ पर्नेमा धादिङको सिद्धलेक गाउँपालिका– ४ का २५ वर्षीय इश्वर थपलिया, दोलखाको बैतेश्वर गाउँपालिका– ४ का ५१ वर्षीय ललितबहादुर बिक, सोही ठाउँका राजकुमार दाहाल र यम खाती र बैतडीको दोगडाकेदार गाउँपालिका– ४ का हरिश भट्ट छन्।

यता पुस १० गते टोखाबाट सिआइबीले चितुवाको २ थान छालासहित ३ जनालाई पक्राउ गरेको थियो। पक्राउ पर्नेमा नुवाकोटको बिदुर नगरपालिका– २ का २० वर्षीय सरोज ओझा, काठमाडौं तारकेश्वर– १ का २३ वर्षीय सुरेन्द्र तामाङ र कैलालीको लम्की चुहा नगरपालिका– ३ का १८ वर्षीय कृष्ण साउद क्षेत्री छन्।

त्यस्तै पुस ११ गते बालुवाटारबाट सिआइबीले ४ किलो सालकको खपटासहित सिन्धुलीको तीनपाटन गाउँपालिका– ७ का २२ वर्षीय कर्णबहादुर सार्कीलाई पक्राउ गरेकाे थियाे। birgunjlive