दाङ | दाङमा ट्रयाक्टरको ठक्करबाट एक विद्यार्थीको मृत्यु भएको छ।जिल्ला प्रहरी कार्यालय दाङका अनुसार बिहीबार पौने १० बजेतिर तुलसिपुर–५ गोदामघर नजिकै ट्रयाक्टरले ठक्कर दिँदा तुलसी आवासिय माविमा कक्षा ८ मा अध्ययनरत १२ वर्षीया विजिता केसीको ज्यान गएको हो ।

रा १ त १४३५ नम्बरको ट्रयाक्टरको ठक्कर दिँदा गम्भीर घाइते भएकी तुलसीपुर ७ शिवनगर निवासी केसीको राप्ती प्रादेशिक अस्पताल तुलसीपुरमा उपचारको क्रममा मृत्यु भएको जिल्ला प्रहरी कार्यालय दाङका प्रहरी नायब उपरीक्षक विनोदबिक्रम शाहले बताए ।

ट्रयाक्टरको ठक्करबाट सोही विद्यालयमा अध्ययनरत १४ वर्षीया मनिषा वली घाइते भएकी छन् । वलीको बायाँ हातमा चोट लागेको छ । उनको राप्ती प्रादेशिक अस्पताल तुलसीपुरमा उपचार भइरहेको छ । प्रहरीले ट्रयाक्टर र चालकलाई नियन्त्रणमा लिएको छ । nepalpostdaily